കൊച്ചി: വരാപ്പുഴയിലെ ശ്രീജിത്തിന്റെ കസ്റ്റഡി മരണവുമായി ബന്ധപ്പെട്ട് സസ്‌പെന്‍ഷനിലായിരുന്ന എസ്.പി എ.വി ജോര്‍ജ്ജിനെ സര്‍വീസിലേക്ക് തിരിച്ചെടുത്തു. ശ്രീജിത്തിന്റെ മരണത്തില്‍ ജോര്‍ജ്ജിന് പങ്കില്ലെന്ന ക്രൈംബ്രാഞ്ച് റിപ്പോര്‍ട്ടിന്റെ അടിസ്ഥാനത്തിലാണ് അദ്ദേഹത്തെ തിരിച്ചെടുത്തത്. ഇന്റലിജന്‍സ് എസ്.പി യാണ് പുതിയ നിയമനം. അതേസമയം ജോര്‍ജിനെതിരായ വകുപ്പ് തല അന്വേഷണം തുടരുമെന്ന് അറിയിച്ചിട്ടുണ്ട്.
ശ്രീജിത്തിന്റെ കസ്റ്റഡി മരണത്തെ തുടര്‍ന്ന് മെയ് 14നാണ് ജോര്‍ജ്ജിനെ സര്‍വ്വീസില്‍ നിന്ന് സസ്‌പെന്‍ഡ് ചെയ്തത്. ജോര്‍ജ്ജിന്റെ കീഴില്‍ പ്രവര്‍ത്തിച്ച റൂറല്‍ ടൈഗര്‍ ഫോഴ്‌സ് ആയിരുന്നു ശ്രീജിത്തിനെ കസ്റ്റഡിയില്‍ എടുത്തത്. തുടര്‍ന്ന് ശ്രീജിത്ത് മരണപ്പെടുകയിരുന്നു. സംഭവത്തില്‍ ജോര്‍ജ്ജിന് വീഴ്ച്ച പറ്റിയെന്നും നടപടി വേണമെന്നും ആവശ്യപ്പെട്ടുള്ള പ്രത്യേക അന്വേഷണ സംഘത്തിന്റെ റിപ്പോര്‍ട്ടിന്റെ അടിസ്ഥാനത്തിലായിരുന്നു സസ്‌പെന്‍ഷന്‍.