തടയണയില്‍ കുളിക്കാനിറങ്ങിയ യുവാവ് മുങ്ങിമരിച്ചു. കോട്ടയം പൂഞ്ഞാര്‍ മങ്കുന്നത്ത് ബോസ് ഈപ്പന്റെ മകന്‍ ജെയിംസ് (22) ആണ് മരിച്ചത്. വ്യാഴാഴ്ച വൈകിട്ട് 6.30-ഓടെയാണ് അപകടം.
പൂഞ്ഞാര്‍ പെരുന്നിലത്തുള്ള തടയണയില്‍ രണ്ടു സുഹൃത്തുക്കള്‍ക്കൊപ്പം കുളിക്കാന്‍ എത്തിയതായിരുന്നു ജെയിംസ്. കുളിക്കുന്നതിനിടെ തടയണയില്‍നിന്ന് പുറത്തേക്ക് വെള്ളം ഒഴുകുന്ന ഭാഗത്ത് ജെയിംസ് കുടുങ്ങിപ്പോകുകയായിരുന്നു.
വെള്ളത്തിന്റെ തള്ളലില്‍ ഇവിടെ അകപ്പെട്ടുപോയ ജെയിംസിനെ പുറത്തെടുക്കാനായില്ല.
ഈരാറ്റുപേട്ടയില്‍നിന്ന് അഗ്‌നിരക്ഷാസേനയെത്തി ജെയിംസിനെ പുറത്തെടുത്ത് ഈരാറ്റുപേട്ടയിലെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. മാതാവ്: മിനി. സഹോദരന്‍ അബു ബോസ്.