ഇ-കൊമേഴ്‌സ് സൈറ്റിന്റെ ഡെലിവറി ബോയിക്ക് വളര്‍ത്തുനായയുടെ ആക്രമണത്തില്‍ ഗുരുതരപരിക്ക്. ലാബ്രഡോര്‍ ഇനത്തില്‍പ്പെടുന്ന നായയില്‍ നിന്നാണ് ആക്രമണമുണ്ടായത്. ഹൈദരാബാദിലെ പഞ്ചവടി കോളനിയിലുള്ള ശ്രീനിധി അപ്പാര്‍ട്ട്‌മെന്റിലാണ് സംഭവം. 30കാരനായ ഇല്യാസ് എന്നയാളാണ് ഗുരുതരാവസ്ഥയില്‍ ചികിത്സയില്‍ കഴിയുന്നത്.
നായയില്‍ നിന്ന് രക്ഷപ്പെടാനായി ഫ്‌ലാറ്റിന്റെ മൂന്നാം നിലയില്‍ നിന്ന് എടുത്തുചാടിയ ഡെലിവറി ബോയിയുടെ കാലുകള്‍ ഒടിഞ്ഞു. നായയെ ശ്രദ്ധയില്ലാതെ വിട്ടതിന് ഉടമയ്‌ക്കെതിരെ പൊലീസ് കേസെടുത്തു. വീട്ടിലെത്തിയ ഇല്യാസിനെ കണ്ടതോടെ നായ കുരക്കാന്‍ തുടങ്ങി. ഇത് കണ്ട് പേടിച്ച ഇയാള്‍ നായയില്‍ രക്ഷപ്പെടാന്‍ പാരപ്പറ്റിലൂടെ താഴേക്ക് ചാടുകയായിരുന്നു. ഇയാളെ രക്ഷിക്കാനായി സാധനം ഓര്‍ഡര്‍ ചെയ്തയാളും മറ്റ് താമസക്കാരും എത്തിയെങ്കിലും ഇയാള്‍ അവരുടെ പിടിയില്‍ നിന്ന് വഴുതി താഴേക്ക് വീഴുകയായിരുന്നു. ഉടനെ ഇയാളെ ആശുപത്രിയില്‍ പ്രവേശിപ്പിച്ചു.