ലോകം ഒന്നടങ്കം ചെറുതും വലുതുമായ സ്‌റ്റോറുകള്‍ ഉള്ള കമ്പനിയാണ് ആപ്പിള്‍. എന്നാല്‍, ലോകത്തെ തന്നെ അമ്പരിപ്പിക്കുന്ന സ്‌റ്റോറാണ് സിംഗപ്പൂരില്‍ ആപ്പിള്‍ തുറന്നത്. സിംഗപ്പൂരിലെ വെള്ളത്തില്‍ പൊങ്ങിക്കിടക്കുന്ന സ്റ്റോര് ഉപഭോക്താക്കളെ മാത്രമല്ല സഞ്ചാരികളെയും അദ്ഭുതപ്പെടുത്തുന്നതാണ്.
ഒരു ഫ്‌ലോട്ടിങ് വിളക്കില്‍ നിന്ന് പ്രചോദനം ഉള്‍ക്കൊണ്ടാണ് ആപ്പിള്‍ വ്യാഴാഴ്ച സിംഗപ്പൂരിലെ മറീന ബേയില്‍ വെള്ളത്തിലിരിക്കുന്ന തനതായ സ്റ്റോര് തുറന്നത്. സിംഗപ്പൂരിലെ ആപ്പിളിന്റെ മൂന്നാമത്തെ റീട്ടെയില്‍ ലൊക്കേഷനാണിത്. ആപ്പിളിന്റെ മറീന ബേ സാന്‍ഡ്‌സ് സ്റ്റോര് പൂര്‍ണമായും വെള്ളത്താല്‍ ചുറ്റപ്പെട്ടിരിക്കുന്നു. കൂടാതെ നഗരത്തിന്റെ 360 ഡിഗ്രി പനോരമിക് കാഴ്ചകളും അതിമനോഹരമായ സ്‌കൈലൈനും വാഗ്ദാനം ചെയ്യുന്നുണ്ട്. പൂര്‍ണമായും ഗ്ലാസില്‍ പണിത ഒരു കുംഭഗോപുരം പോലെയുള്ള ആപ്പിള്‍ സ്റ്റോര് നിരവധി പേരാണ് കാണാനെത്തുന്നത്.
കുത്തനെയുള്ള 10 ബാറുകളില്‍ 114 ഗ്ലാസുകള്‍ ഒന്നൊന്നായി ചേര്‍ത്തുവെച്ചാണ് കുംഭഗോപുരം നിര്‍മിച്ചിരിക്കുന്നത്. താഴികക്കുടത്തിന്റെ അഗ്രത്തില്‍ ഒരു ഒക്കുലസ് സ്ഥിതിചെയ്യുന്നുണ്ട്. ഇത് വഴി അകത്തേക്ക് പ്രകാശരശ്മികള്‍ വരുന്നു. റോമിലെ പന്തീയോനില്‍ നിന്നാണ് ഒക്കുലസ് പ്രചോദനമായത് എന്നാണ് ആപ്പിള്‍ പറയുന്നത്. ഗ്ലാസിന്റെ ഇന്റീരിയര്‍ ഇഷ്ടാനുസൃത ബഫിലുകള്‍ കൊണ്ട് നിരത്തിയിരിക്കുന്നു. ഓരോന്നും പകല്‍സമയത്തെ സൂര്യ കിരണങ്ങളെ പ്രതിരോധിക്കുന്നതിനും രാത്രിസമയത്തെ ലൈറ്റിങ് ഇഫക്റ്റ് നല്‍കുന്നതിനും പ്രത്യേകമായി രൂപപ്പെടുത്തിയിരിക്കുന്നു.
താഴികക്കുടത്തിന്റെ ഉള്‍ഭാഗത്ത് മരങ്ങളും കാണാം. ഇത് സസ്യജാലങ്ങളിലൂടെ അധിക ഷേഡിങും മൃദുവായ നിഴലുകളും നല്‍കുന്നു. 23 ഭാഷകളില്‍ സംസാരിക്കുന്ന 150 ഓളം ജീവനക്കാര്‍ ആപ്പിള്‍ മറീന ബേ സാന്‍ഡ്‌സിലേക്ക് സന്ദര്‍ശകരെ സ്വാഗതം ചെയ്യാന്‍ തയാറാണെന്നാണ് ആപ്പിള്‍ പറയുന്നത്.