കൊച്ചി: യുവ സംവിധായകന്‍ ജീന്‍പോള്‍ ലാലിനെ പിന്തുണച്ച് നടന്‍ ബാബുരാജ്. ജീന്‍ സംവിധാനം ചെയ്ത ഹണീബിയുടെ രണ്ടു ഭാഗങ്ങളിലും അഭിനയിച്ച താരമാണ് ബാബുരാജ്. നടിയുടെ പരാതി തെറ്റാകാനാണ് സാധ്യതയെന്ന് ബാബുരാജ് പറഞ്ഞു.
ജീനിനെ അടുത്തറിയാവുന്ന വ്യക്തിയാണ് താന്‍. ജീനിനെ വിളിച്ച് ഇക്കാര്യം ചോദിച്ചിരുന്നു. പരാതിക്കാരിയെ ഹണി ബീ 2ല്‍ ഒരു വേഷത്തിനായി പരിഗണിച്ചിരുന്നു. പിന്നീട് വേഷം നല്‍കിയില്ല. അതിന്റെ ദേഷ്യമാണ് പരാതിയുടെ കാരണമെന്നാണ് അറിയാന്‍ കഴിഞ്ഞതെന്ന് ബാബുരാജ് പറയുന്നു. എന്നാല്‍ ജീനും സുഹൃത്തുക്കളും അങ്ങനെ പറഞ്ഞിട്ടുണ്ടെങ്കില്‍ ശിക്ഷ ലഭിക്കണമെന്നും ബാബുരാജ് പറഞ്ഞു.
ഹണിബീയുടെ ചിത്രീകരണം കഴിഞ്ഞിട്ട് ആറ് മാസമായി. ഇത്രയും കാലം ഈ കുട്ടി എവിടെയായിരുന്നു. ഒരു പരാതി നല്‍കാന്‍ ഇത്രയും കാലം താമസിച്ചത് എന്തിനാണെന്നും ബാബുരാജ് ചോദിച്ചു. നടി ആക്രമിക്കപ്പെട്ട കേസും എം.എല്‍.എയുടെ പീഢനക്കേസും നിലനില്‍ക്കുന്നതിനാലാണ് ഇതിന് ഇത്രയും പ്രാധാന്യം കിട്ടുന്നത്. കുറേ കഴിയുമ്പോള്‍ ആളുകള്‍ക്ക് മടുക്കും. പരാതിക്കാര്‍ കള്ളം പറയുന്നുവെന്ന് ജനങ്ങള്‍ക്ക് തോന്നും. ഇതുമൂലം യഥാര്‍ത്ഥ ഇരയ്ക്ക് പോലും നീതി കിട്ടാതെ വരുമെന്നും ബാബുരാജ് കൂട്ടിച്ചേര്‍ത്തു.