മണിപ്പൂരില്‍ വീണ്ടും സംഘര്‍ഷം. ഇംഫാല്‍ വെസ്റ്റ് ജില്ലയില്‍ അക്രമകാരികള്‍ 2 വീടുകള്‍ തീവെച്ച് നശിപ്പിച്ചു. രാത്രി 10 മണിയോടെ കെയ്‌തെലാന്‍ബി പൊലീസ് സ്‌റ്റേഷന്‍ പരിധിയിലാണ് സംഘര്‍ഷമുണ്ടായത്.
സുരക്ഷാസേനയും ഫയര്‍ഫോഴ്‌സും എത്തിയാണ് തീയണച്ചത്. സംഘര്‍ഷത്തെ തുടര്‍ന്ന് സ്ത്രീകളുടെ ഒരു സംഘം പ്രദേശത്ത് തടിച്ചുകൂടിയെങ്കിലും സുരക്ഷാസേന ഇടപ്പെട്ട് ഇവരെ ശാന്തരാക്കി.
അജ്ഞാതരായ അക്രമികള്‍ സംഭവസ്ഥലത്ത് നിന്ന് രക്ഷപ്പെട്ടതായും പൊലീസ് പറഞ്ഞു. സുരക്ഷാ സേനയും അഗ്‌നിശമന സേനാംഗങ്ങളും ചേര്‍ന്ന് തീ നിയന്ത്രണ വിധേയമാക്കിയതായി പൊലീസ് അറിയിച്ചു. പ്രദേശത്ത് കൂടുതല്‍ സുരക്ഷ ഏര്‍പ്പെടുത്തിയിട്ടുണ്ടെന്നും സ്ഥിതിഗതികള്‍ നിയന്ത്രണ വിധേയമാണെന്നും പൊലീസ് അറിയിച്ചു.
മെയ് മൂന്നിനാണ് മണിപ്പൂരില്‍ െ്രെടബല്‍ സോളിഡാരിറ്റി മാര്‍ച്ചിനെ തുടര്‍ന്ന് കലാപം പൊട്ടിപ്പുറപ്പെട്ടത്. പട്ടികവര്‍ഗ്ഗ പദവിക്കായുള്ള മെയ്‌തെയ് വിഭാഗത്തിന്റെ ആവശ്യത്തിനെതിരെയായിരുന്നു മാര്‍ച്ച്. ഇതുവരെ 175ലധികം ആളുകള്‍ കൊല്ലപ്പെടുകയും 60,000ല്‍ കൂടുതല്‍ ആളുകള്‍ പലായനം നടത്തുകയും ചെയ്തതായാണ് റിപ്പോര്‍ട്ട്.