യു.പിയിലെ ആഗ്രയില്‍ ദലിത് യുവതിയെ ബലാത്സംഗം ചെയ്ത ശേഷം കെട്ടിത്തൂക്കിയെന്ന പരാതിയില്‍ പൊലീസ് കോണ്‍സ്റ്റബിള്‍ അറസ്റ്റില്‍. രാഘവേന്ദ്ര സിങ് (27) എന്നയാളാണ് പിടിയിലായത്. ബെലാന്‍ഗഞ്ചിലുള്ള ഇയാളുടെ വാടക മുറിയില്‍ ഡിസംബര്‍ 29നാണ് 25കാരിയെ തൂങ്ങിമരിച്ച നിലയില്‍ കണ്ടെത്തിയത്. പോസ്റ്റ്‌മോര്‍ട്ടത്തില്‍ തൂങ്ങിയതിനെ തുടര്‍ന്നാണ് മരണമെന്ന് സ്ഥിരീകരിച്ചിട്ടുണ്ട്.
രാഘവേന്ദ്ര സിങ്ങും മരിച്ച യുവതിയും ഝാന്‍സിയില്‍ നഴ്‌സിങ് പരിശീലനത്തിനിടെ അടുപ്പത്തിലായതാണെന്നും സിങ്ങിന്റെ വീട്ടില്‍ വിവാഹാലോചനയുമായി ചെന്നപ്പോള്‍ നിരസിക്കുകയായിരുന്നെന്നും യുവതിയുടെ സഹോദരന്‍ പറഞ്ഞു. ഇതിന് ശേഷവും ഇരുവരും തമ്മില്‍ ബന്ധം തുടര്‍ന്നെന്നും സഹോദരന്‍ വെളിപ്പെടുത്തി.
ഗുരുഗ്രാമിലെ കിഡ്‌നി സെന്ററില്‍ ജോലി ചെയ്യുന്ന യുവതി സംഭവം നടക്കുന്നതിന്റെ തലേന്നാണ് രാഘവേന്ദ്ര സിങ്ങിന്റെ വാടക വീട്ടിലെത്തിയതെന്ന് പൊലീസ് പറഞ്ഞു. സംഭവ ദിവസം സ്റ്റേഷനില്‍ പോയ സിങ് നേരത്തെ മടങ്ങിയിരുന്നു. ശേഷം സഹപ്രവര്‍ത്തകരെ വിളിച്ചറിയിക്കുകയായിരുന്നു. യുവതിയുടെ ബന്ധുക്കളുടെ പരാതിയിലാണ് അറസ്റ്റ്.