മുംബൈ: അധോലോക കുറ്റവാളി ദാവൂദ് ഇബ്രാഹിം പാക് യുവതിയുമായി വിവാഹം കഴിച്ചെന്ന് വിവരം. ദാവൂദിനെക്കുറിച്ച് സഹോദരീപുത്രന്‍ അലീഷ പാര്‍ക്കറാണ് പുതിയ വെളിപ്പെടുത്തല്‍ നടത്തിയത്. ദാവൂദ് ഇബ്രാഹിം രണ്ടാമതും വിവാഹിതനായെന്നാണ് ദേശീയ അന്വേഷണ ഏജന്‍സിക്ക് (എന്‍ഐഎ) അലീഷ നല്‍കിയ മൊഴി. പാക്കിസ്ഥാനിലുള്ള പഠാന്‍ വംശജയായ യുവതിയാണ് ദാവൂദ് ഇബ്രാഹിമിന്റെ പുതിയ ഭാര്യയെന്നാണു വെളിപ്പെടുത്തല്‍.
ആദ്യ ഭാര്യ മെഹജബിന്‍ ഷെയ്ഖുമായുള്ള വിവാഹബന്ധം വേര്‍പ്പെടുത്തിയെന്ന വാര്‍ത്ത വ്യാജമാണെന്നും അലീഷ പാര്‍ക്കര്‍ എന്‍ഐഎയോടു പറഞ്ഞു. ഇവര്‍ക്ക് മൂന്നു പെണ്‍മക്കളുണ്ട്. വാട്‌സാപ് കോള്‍ വഴി മെഹജബിന്‍ പുറംലോകവുമായി ബന്ധപ്പെടുന്നുണ്ടെന്നും അലീഷ പറയുന്നു.
ദാവൂദ് ഇബ്രാഹിം കുടുംബത്തോടൊപ്പം പാക്കിസ്ഥാനിലെ കറാച്ചിയിലുള്ള അബ്ദുല്ല ഗാസി ബാബ ദര്‍ഗയ്ക്ക് പിന്നിലെ പ്രതിരോധ മേഖലയിലാണ താമസിക്കുന്നതെന്ന് അലീഷ എന്‍ഐഎയോടു പറഞ്ഞു.