ബംഗളൂരു: ഹൈദരാബാദിന്റെ പേരു മാറ്റണം എന്നാവശ്യപ്പെട്ട് ബിജെപി യുവനേതാവ് തേജസ്വ സൂര്യ പ്രഖ്യാപിച്ച ചെയ്ഞ്ച് ഹൈദരാബാദ് ക്യാംപയിനെതിരെ വ്യാപക വിമര്‍ശം. ഹൈദരാബാദിലേക്കു സ്വാഗതം എന്നു പറഞ്ഞാണ് ട്വിറ്റര്‍ സമൂഹം പരിഹാസ രൂപേണ തേജസ്വി സൂര്യയെ വരവേറ്റത്. ബംഗളൂരു സൗത്ത് എംപിയാണ് തേജസ്വി.
ഭാഗ്യനഗര്‍ എന്നാണ് ഇദ്ദേഹം ഹൈദരാബാദിനെ വിശേഷിപ്പിച്ചത്. ഭാഗ്യനഗറിലെ പ്രിയപ്പെട്ട യുവാക്കളെ എന്ന അഭിസംബോധനയോടെയാണ് ഇദ്ദേഹത്തിന്റെ ട്വീറ്റ് ആരംഭിക്കുന്നത്. താന്‍ പങ്കെടുക്കുന്ന ചെയ്ഞ്ച് ഹൈദരാബാദ് ക്യാംപയിനില്‍ അണി ചേരാനായിരുന്നു തേജസ്വിയുടെ ആഹ്വാനം.
എന്നാല്‍ മണിക്കൂറുകള്‍ക്കുള്ളില്‍ ഇത് ഹൈദരാബാദാണ് ഭാഗ്യനഗര്‍ അല്ല (ഇറ്റ്‌സ്‌ഹൈദരാബാദ്‌നോട്ട്ഭാഗ്യനഗര്‍) എന്ന ഹാഷ്ടാഗ് ട്വിറ്ററില്‍ ട്രന്‍ഡിങ്ങായി. ഹൈദരാബാദ് അങ്ങനെ നിന്നോട്ടെ, അതിനെ മാറ്റാന്‍ നോക്കേണ്ട, എന്റെ നഗരം എല്ലായ്‌പ്പോഴും അങ്ങനെ തന്നെ ആയിരിക്കും, ഒരു സംശയവും വേണ്ട ഇത് ഹൈദരാബാദ് തന്നെ, ഹൈദരാബാദ് ഞങ്ങളുടെ ഐഡന്റിറ്റിയാണ് തുടങ്ങിയ ആയിരക്കണക്കിന് സന്ദേശങ്ങളാണ് ട്വിറ്ററില്‍ പ്രത്യക്ഷപ്പെട്ടത്.