സീറ്റ് നിഷേധിച്ചതിനെ തുടര്‍ന്ന് ബിജെപിയോട് ഇടഞ്ഞ കര്‍ണാടക മുന്‍ ഉപമുഖ്യമന്ത്രി ലക്ഷ്മണ്‍ സവദി കോണ്‍ഗ്രസില്‍ ചേര്‍ന്നു. പ്രതിപക്ഷ നേതാവ് സിദ്ധരാമയ്യയുടെ വസതിയില്‍ നടന്ന കൂടിക്കാഴ്ചയിലായിരുന്നു തീരുമാനം. എഐ സി സി ജനറല്‍ സെക്രട്ടറി രണ്‍ദീപ് സിങ് സുര്‍ജേവാലയുടെയും കര്‍ണാടക പിസിസി അധ്യക്ഷന്‍ ഡികെ ശിവകുമാറിന്റെയും സാന്നിധ്യത്തിലായിരുന്നു ചര്‍ച്ച.
കോണ്‍ഗ്രസ് കുടുംബത്തിലേക്ക് സവദിയെ സ്വാഗതം ചെയ്യുന്നതായി ഡികെ ശിവകുമാര്‍ മാധ്യമങ്ങളോട് പറഞ്ഞു. സവദിക്കു നല്‍കേണ്ട പദവി സംബന്ധിച്ച് ചര്‍ച്ച ഉണ്ടായെന്നും വൈകാതെ കാര്യങ്ങള്‍ അറിയിക്കാമെന്നും ശിവകുമാര്‍ വ്യക്തമാക്കി. അത്താനിയില്‍ കോണ്‍ഗ്രസ് ഇതുവരെ സ്ഥാനാര്‍ഥിയെ പ്രഖ്യാപിച്ചിട്ടില്ല. ലക്ഷ്മണ്‍ സവദി പാര്‍ട്ടി സ്ഥാനാര്‍ഥി ആയേക്കുമെന്നാണ് സൂചന.