ലഖ്‌നൗവില്‍ പ്രായപൂര്‍ത്തിയാവാത്ത പെണ്‍കുട്ടിയെ കൂട്ടബലാത്സംഗത്തിന് ഇരയാക്കി കുഴല്‍കിണറില്‍ തള്ളി. സംഭവത്തില്‍ പൊലീസ് രണ്ടുപേരെ അറസ്റ്റ് ചെയ്തു. ഉത്തര്‍പ്രദേശിലെ ഘോസി പൊലീസ് സ്‌റ്റേഷന്‍ പരിധിയില്‍ താമസിക്കുന്ന 14 വയസ്സുകാരിയാണ് ബലാത്സംഗത്തിരയായത്. വെള്ളിയാഴ്ച്ച രാവിലെയാണ് സംഭവം നടന്നത്. മാലിന്യം കളയുന്നതിനു വേണ്ടി പുറത്തുപോയ കുട്ടിയെ തട്ടികൊണ്ടുപോയി കൂട്ടബലാത്സംഗം ചെയ്തതാണ് എന്നാണ് കുട്ടിയുടെ പിതാവിന്റെ പരാതിയില്‍ കൊടുത്തിരിക്കുന്നത്.
വീട്ടില്‍ നിന്നും 200 മീറ്റര്‍ അകലെയുള്ള കൃഷിയിടത്തിനടുത്തുള്ള കുഴല്‍കിണറില്‍ നിന്നാണ് കുട്ടിയെ കണ്ടെത്തിയത്. അവിടെ ജോലി ചെയ്തിരുന്ന തൊഴിലാളികളാണ് കൈകാലുകള്‍ കെട്ടി, വായില്‍ തുണിതിരുകിയ നിലയില്‍ കണ്ടെത്തുകയായിരുന്നു. തുടര്‍ന്ന് ഇവര്‍ തന്നെയാണ് കുട്ടിയെ കിണറില്‍ നിന്ന് രക്ഷിച്ച് പൊലീസില്‍ വിവരമറിയിക്കുകയായിരുന്നു. സംഭവത്തെ തുടര്‍ന്ന് പോക്‌സോ വകുപ്പുകള്‍ ചുമത്തി കേസ് റജിസ്റ്റര്‍ ചെയ്ത്, മൂന്നാം പ്രതിക്കായി അന്വേഷണം നടത്തി വരികയാണെന്ന് പൊലീസ് അറിയിച്ചു.