ലഖ്‌നൗ: പ്രധാനമന്ത്രിയെ അഭിസംബോധന ചെയ്തുകൊണ്ട് 18 പേജുള്ള ആത്മഹത്യാക്കുറിപ്പെഴുതി വെച്ച് 16 വയസുകാരിയായ വിദ്യാര്‍ത്ഥിനി ആത്മഹത്യ ചെയ്തു. ഉത്തര്‍പ്രദേശിലെ ലക്‌നൗവിലാണ് സംഭവം. അഴിമതിയും മലിനീകരണവുമാണ് ആത്മഹത്യക്ക് കാരണമെന്നാണ് കുറിപ്പില്‍ പറയുന്നതെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.
മാതാപിതാക്കളെ വൃദ്ധസദനങ്ങളിലേക്കയക്കുന്ന നാട്ടില്‍ തനിക്ക് ഇനിയും ജീവിക്കേണ്ടെന്നാണ് കുറിപ്പിന്റെ തുടക്കത്തില്‍ പറയുന്നത്. ദീപാവലിക്ക് പടക്കങ്ങള്‍ പൊട്ടിക്കുന്നതും ഹോളിക്ക് രാസവസ്തുക്കളടങ്ങിയ നിറങ്ങള്‍ ഉപയോഗിക്കുന്നതും നിരോധിക്കണമെന്നും കുറിപ്പില്‍ പറയുന്നു.
അതേസമയം പെണ്‍കുട്ടി മാനസിക പ്രശ്‌നങ്ങള്‍ക്ക് ചികിത്സ തേടിയിരുന്നതായി മാതാപിതാക്കള്‍ പറഞ്ഞതായി പൊലീസ് വ്യക്തമാക്കി. മകളുടെ ആത്മഹത്യാക്കുറിപ്പ് അവളുടെ അവസാനത്തെ ആഗ്രഹമാണെന്നും അത് പ്രധാനമന്ത്രിയുടെ അടുത്തെത്തിക്കണമെന്നാണ് തങ്ങളുടെ ആഗ്രഹമെന്നും പെണ്‍കുട്ടിയുടെ പിതാവ് പറഞ്ഞു.