– ‘എന്റെ ജനതയുടെ സന്തോഷമാണ് എന്റെ സമ്പാദ്യം’ – ശൈഖ് സായിദ് ബിന്‍ സുല്‍ത്താന്‍ ആല്‍ നഹ്‌യാന്‍
ദുബൈ: എന്റെ ജനതയുടെ സന്തോഷമാണ് എന്റെ സമ്പാദ്യം എന്ന രാഷ്ട്രപിതാവ് ശൈഖ് സായിദ് ബിന്‍ സുല്‍ത്താന്റെ വിഖ്യാത തത്വത്തിലൂന്നി അന്താരാഷ്ട്ര സന്തോഷദിനാചരണം യുഎഇ വിപുലമായി ആഘോഷിച്ചു. ദുബൈയില്‍ യാത്രക്കാര്‍ക്ക് സൗജന്യ ടാക്‌സി, ബസ് യാത്രകള്‍ തരപ്പെട്ടപ്പോള്‍ 11 തടവുകാരെ മോചിപ്പിച്ചാണ് ഷാര്‍ജ സന്തോഷദിനം ആഘോഷിച്ചത്.
ദുബൈ എയര്‍പോര്‍ട്ട് ടെര്‍മിനലുകളില്‍ യാത്രക്കാര്‍ക്ക് പാസ്‌പോര്‍ട്ടില്‍ ഹാപ്പിനസ് സ്റ്റാമ്പുകള്‍ പതിച്ചുകിട്ടി. സന്തോഷ മുദ്രയോടൊപ്പം ‘സന്തുഷ്ട യുഎഇയിലേക്ക് സ്വാഗതം’ എന്ന സന്ദേശവും സ്റ്റാമ്പിലുണ്ടായിരുന്നു. ആര്‍.ടി.എയുടെ പ്രഖ്യാപനങ്ങളായ ഫ്രീ ടാക്‌സി റൈഡുകളും ഇന്നലെ നൂറു പേര്‍ക്ക് ലഭിച്ചു. ദുബൈ എയര്‍പോര്‍ട്ടില്‍ നിന്നു യാത്ര പുറപ്പെട്ടവര്‍ക്കാണ് സൗജന്യ യാത്ര വീണുകിട്ടിയത്.