മാത്യു കുഴല്‍നാടന്‍ എംഎല്‍എയുടെ ഉടമസ്ഥതയിലുള്ള ചിന്നക്കനാലിലെ റിസോര്‍ട്ടിന് ലൈസന്‍സ് പുതുക്കി നല്‍കി. ഈ വര്‍ഷം ഡിസംബര്‍ 31 വരെയുള്ള ഹോംസ്റ്റേ ലൈസന്‍സ് ആണ് പുതുക്കി നല്‍കിയിരിക്കുന്നത്. കഴിഞ്ഞ മാര്‍ച്ച് 31ന് ഹോം സ്‌റ്റെ ലൈസന്‍സിന്റെ കാലാവധി കഴിഞ്ഞിരുന്നു. തുടര്‍ന്ന് അഞ്ചുവര്‍ഷത്തേക്ക് ലൈസന്‍സ് പുതുക്കി നല്‍കണമെന്ന് എംഎല്‍എ ആവശ്യപ്പെട്ട് അപേക്ഷ നല്‍കിയിരുന്നു.
ഇതിനായി സംസ്ഥാന മലിനീകരണ നിയന്ത്രണ ബോര്‍ഡിന്റെ എന്‍ഒസിയും പൊലീസ് ക്ലിയറന്‍സ് സര്‍ട്ടിഫിക്കറ്റും ഹാജരാക്കണമെന്ന് അധികൃതര്‍ നിര്‍ദേശിച്ചിരുന്നു. തുടര്‍ന്ന് ഡിസംബര്‍ 31 വരെ കാലാവധിയുള്ള മലിനീകരണ നിയന്ത്രണ ബോര്‍ഡിനെ സര്‍ട്ടിഫിക്കറ്റ് ആണ് മാത്യു കുഴല്‍നാടന്‍ ഹാജരാക്കിയത്. തുടര്‍ന്ന് ഡിസംബര്‍ 31 വരെ ലൈസന്‍സ് പുതുക്കി നല്‍കുകയായിരുന്നു.
മാസപ്പടി വിവാദത്തില്‍ സംസ്ഥാന സര്‍ക്കാരിനെതിരെ രൂക്ഷ വിമര്‍ശനവുമായി മാത്യു രംഗത്തെത്തിയപ്പോള്‍ ഈ റിസോര്‍ട്ടും അതില്‍ നിയമലംഘനങ്ങളുണ്ടെന്ന് ആരോപിച്ചായിരുന്നു സിപിഎം ആക്രമണം നടത്തിയത്.