തിരുവനന്തപുരം: കുറഞ്ഞ തുകക്ക് ഒരു മാസം റീചാര്‍ജ്ജ് ചെയ്താല്‍ നിര്‍ത്താതെ ഫോണില്‍ സംസാരിക്കാന്‍ കഴിയുന്ന കാലത്ത് മന്ത്രിമാരുടെ അമ്പരപ്പിക്കുന്ന ഫോണ്‍ബില്ല് പുറത്ത്. കഴിഞ്ഞ വര്‍ഷം മന്ത്രിമാരെല്ലാവരും കൂടി ഒരു മാസം വിളിച്ചു കൂട്ടിയത് 1,03,252രൂപക്കാണെന്നാണ് പുറത്തുവന്ന റിപ്പോര്‍ട്ട്. ഇതില്‍ അരലക്ഷം രൂപക്ക് ഫോണ്‍ വിളിച്ചത് മന്ത്രി കെ.ടി ജലീലാണ്. 53,310 രൂപയാണ് കെ.ടി ജലീലിനു വേണ്ടി സര്‍ക്കാര്‍ അടച്ച തുക.
സെപ്തംബര്‍ മാസത്തില്‍ മന്ത്രി ഏ.കെ ബാലന്റെ തുക 29,253 രൂപയാണ്. ഒക്ടോബറില്‍ പ്രതിപക്ഷ നേതാവ് രമേഷ് ചെന്നിത്തലക്ക് 5161 രൂപയാണ് ബില്ല് വന്നത്. മന്ത്രികടകം പള്ളി സുരേന്ദ്രന്റെ ബില്ല് 4167രൂപയാണ്. എന്നാല്‍ അരലക്ഷത്തിനും ആയിരങ്ങള്‍ക്കും മുകളില്‍ ബില്ലുകള്‍ പോകുമ്പോള്‍ മിതമായ തുക ഫോണ്‍ബില്ലായി വന്ന മന്ത്രിമാരുമുണ്ട്. മന്ത്രിമാരായ കെ.കെ ശൈലജ, ഇ.ചന്ദ്രശേഖരന്‍,ടി.പി രാമകൃഷ്ണന്‍, പി.തിലോത്തമന്‍,രാമചന്ദ്രന്‍ കടന്നപ്പള്ളി, വി.എസ് സുനില്‍കുമാര്‍, ഏ.സി മൊയ്തീന്‍, കെ.രാജു എന്നിവരുടെ ഫോണ്‍ബില്ലുകള്‍ വെറും 625 രൂപയുമാണ്. അതായത് ഇവര്‍ക്കായി ഫോണ്‍ബില്ലിനായി സര്‍ക്കാര്‍ ഖജനാവില്‍ നിന്നും ചിലവായത് 625 രൂപമാത്രമാണ്.