ജൊഹാനസ്ബര്‍ഗ്: ദക്ഷിണാഫ്രിക്കയിലെ ജൊഹനസ്ബര്‍ഗില്‍ മ്യൂസിക് വീഡിയോ ചിത്രീകരണത്തിനിടെ തോക്കുധാരികളായ സംഘം എട്ട് യുവതികളെ കൂട്ടബലാത്സംഗം ചെയ്തു. ചെറുപട്ടണമായ ക്രുഗെര്‍സ്‌ഡോര്‍പ്പില്‍ തോക്കിന്‍ മുനയിലാണ് മോഡലുകള്‍ ബലാത്സംഗത്തിനിരയായത്. ശേഷം ഷൂട്ടിങ് ലൊക്കേഷനിലുണ്ടായിരുന്നവരുടെ ആഭരണങ്ങളും പണവും വില പിടിപ്പുള്ള മറ്റ് സാധനങ്ങളും അക്രമികള്‍ കവര്‍ന്നു.
സംഭവവുമായി ബന്ധപ്പെട്ട് 65 പേരെ പൊലീസ് അറസ്റ്റ് ചെയ്തിട്ടുണ്ട്. ആക്രമണം നടക്കുമ്പോള്‍ 12 സ്ത്രീകളും 10 പുരുഷന്മാരും സ്ഥലത്തുണ്ടായിരുന്നു. ഷൂട്ടിങ്ങിനുള്ള ഒരുക്കങ്ങള്‍ നടക്കുമ്പോഴാണ് സംഘം ഇരച്ചുകയറിയത്. ആകാശത്തേക്ക് വെടിവെച്ച് ഭീകരാന്തരീക്ഷം സൃഷ്ടിച്ച ശേഷം എല്ലാവരോടും കമിഴ്ന്ന് കിടക്കാന്‍ ആവശ്യപ്പെട്ടു. ശേഷം കൊള്ളയടിക്കുകയും എട്ട് യുവതികളെ കൂട്ടബലാത്സംഗത്തിനിരയാക്കുകയും ചെയ്തതായി ഇരകളില്‍ ഒരാളായ യുവതി പറഞ്ഞു. മാഫിയ സംഘങ്ങളുടെ ശക്തികേന്ദ്രമായ മേഖലയിലാണ് സംഭവം. ദക്ഷിണാഫ്രിക്കന്‍ പ്രസിഡന്റ് സിറില്‍ റമഫോസ ആക്രമണത്തെ അപലപിച്ചു.