ദുബൈ: ഈ വര്‍ഷത്തെ ഐപിഎല്‍ സീസണ്‍ അവസാനിച്ചതിന് പിന്നാലെ ഐപിഎല്‍ ടൂര്‍ണമെന്റിലെ പുതിയ ടീമിനെ കുറിച്ചുള്ള ചര്‍ച്ചകള്‍ സജീവമാവുകയാണ്. മോഹന്‍ലാലിന്റെ ഉമസ്ഥതയില്‍ അടുത്ത വര്‍ഷം പുതിയ ടീം ഇറങ്ങുമെന്നാണ് പ്രചാരണം. കഴിഞ്ഞ ദിവസം ഐപിഎല്‍ ഫൈനല്‍ കാണാന്‍ മോഹന്‍ലാല്‍ എത്തിയതിനെ തുടര്‍ന്നാണ് പുതിയ ടീം സംബന്ധിച്ച ചര്‍ച്ചകള്‍ സജീവമായത്.
എന്നാല്‍ പ്രചരിക്കുന്ന വാര്‍ത്ത വിശ്വസിക്കാന്‍ തക്ക സ്ഥിരീകരണമൊന്നും ഉണ്ടായിട്ടില്ല എന്നതാണ് വസ്തുത. ഇതുസംബന്ധിച്ച് ഇപ്പോള്‍ പ്രചരിച്ചുകൊണ്ടിരിക്കുന്ന ദി ഹിന്ദു പത്രത്തിന്റെ ഓണ്‍ലൈന്‍ വാര്‍ത്ത 2009ലേതാണ്. ഇത് സംബന്ധിച്ച് മോഹന്‍ലാലുമായി ബന്ധപ്പെട്ട കേന്ദ്രങ്ങള്‍ ഇതുവരെ യാതൊരു പ്രതികരണവും നടത്തിയിട്ടില്ല.
സ്റ്റാര്‍ ഗ്രൂപ്പുമായുള്ള ബന്ധം കാരണമാണ് ഐപിഎല്‍ ഫൈനല്‍ മത്സരത്തില്‍ ലാലിന് പ്രത്യേക അതിഥിയായി പങ്കെടുക്കാനായത്. ഡിസ്‌നി-സ്റ്റാര്‍ കണ്‍ട്രി ഹെഡ് കെ. മാധവന്‍ ലാലിനൊപ്പമുണ്ടായിരുന്നു. 2009ല്‍ മോഹന്‍ലാലും പ്രിയദര്‍ശനും ചേര്‍ന്ന് ഐപിഎല്‍ ടീമിനായി ശ്രമിച്ചിരുന്നു. എന്നാല്‍ ചിലവ് താങ്ങാന്‍ കഴിയാത്തതിനാല്‍ പിന്‍മാറുകയായിരുന്നു.