കൊച്ചി: നെടുമ്പാശേരി എംബാര്‍ക്കേഷന്‍ വഴിയുള്ള ആദ്യ ഹജ്ജ് വിമാനം ജൂണ്‍ 7ന് പുറപ്പെടും. തെക്കന്‍ കേരളത്തില്‍ നിന്നുള്ള 2213 ഹാജിമാരും, ലക്ഷദീപില്‍ നിന്നുള്ള 164 ഹാജിമാരുമാണ് ഇത്തവണ നെടുമ്പാശേരി വിമാനത്താവളം വഴി പോകുന്നത്. സിയാല്‍ തന്നെയാണ് നെടുമ്പാശേരി എംബാര്‍ക്കേഷന്‍ സെന്ററിനു വേണ്ടിയുള്ള എല്ലാ സൗകര്യങ്ങളും ഒരുക്കുന്നത്. കേരളത്തില്‍ ഇക്കുറി വിശുദ്ധ ഹജ്ജ് കര്‍മത്തിനായി മൂന്നു എംബാര്‍ക്കേഷന്‍ സെന്ററുകളാണ് അനുവദിച്ചിട്ടുള്ളത്. തെക്കന്‍ കേരളത്തില്‍ നിന്നുള്ളവര്‍ നെടുമ്പാശേരി വിമാനത്താവളം വഴി ഹജ്ജിന് പുറപ്പെടുമ്പോള്‍ വടക്കന്‍ കേരളത്തില്‍ നിന്നുള്ളവര്‍ കോഴിക്കോട്, കണ്ണൂര്‍ വിമാനത്താവളം വഴിയായിരിക്കും പുറപ്പെടുക.