തുര്‍ക്കിയേയും സിറിയയേയും പിടിച്ചു കുലുക്കിയ ഭൂകമ്ബത്തില്‍ ദുരിതമനുഭവിക്കുന്നവര്‍ക്ക് ഐക്യദാര്‍ഢ്യവുമായി ഫുട്ബോള്‍ ഇതിഹാസം ലയണല്‍ മെസ്സി.തുര്‍ക്കിയിലേയും സിറിയയിലേയും കാഴ്ചകള്‍ ഏറെ സങ്കടകരമാണെന്നും അവര്‍ക്ക് കൈത്താങ്ങാവാന്‍ കഴിയണമെന്നും മെസ്സി പറഞ്ഞു. തന്‍റെ സോഷ്യല്‍ മീഡിയ പേജുകളിലൂടെയാണ് താരത്തിന്‍റെ പ്രതികരണം.
“ഭൂകമ്ബം ദുരിതം വിതച്ച സിറിയയിലേയും തുര്‍ക്കിയിലേയും ആയിരക്കണക്കിന് കുഞ്ഞുങ്ങളും അവരുടെ കുടുംബങ്ങളും ഏറെ സങ്കടം നിറഞ്ഞ ദിവസങ്ങളിലൂടെയാണ് കടന്നു പോവുന്നത്. എന്റെ ഹൃദയം അവര്‍ക്കൊപ്പമാണ്. ഭൂകമ്ബ ബാധിത പ്രദേശങ്ങളിലെ കുട്ടികള്‍ക്ക് സുരക്ഷയൊരുക്കാനുള്ള പ്രവര്‍ത്തനങ്ങളില്‍ ഏര്‍പ്പെട്ട് കൊണ്ടിരിക്കുകയാണ് യൂനിസെഫ്. ഈ സമയത്ത് നിങ്ങളുടെ സഹായങ്ങളും ഏറെ വിലപ്പെട്ടതാണ്”- മെസ്സി കുറിച്ചു.തുര്‍ക്കി, സിറിയ ഭൂകമ്ബത്തില്‍ മരണം 33,000 പിന്നിട്ടു തുര്‍ക്കിയില്‍ 29,605 പേരും സിറിയയില്‍ 3,576 പേരുമാണ് മരിച്ചത്. സിറിയയില്‍ കൂടുതല്‍ പേര്‍ മരിച്ചത് വിമത പ്രദേശമായ ഇദ്‌ലിബിലാണ്. മരണസംഖ്യ ഇനിയുമേറെ ഉയരുമെന്ന് വിമത പ്രദേശത്ത് രക്ഷാപ്രവര്‍ത്തനം നടത്തിയ വൈറ്റ് ഹെല്‍മറ്റ്‌സ് ആശങ്ക പ്രകടിപ്പിച്ചു. തുര്‍ക്കിയില്‍ കൊല്ലപ്പെട്ട 1,100 അഭയാര്‍ഥികളുടെ മൃതദേഹങ്ങള്‍ സിറിയക്ക് കൈമാറി. 1939ന് ശേഷം തുര്‍ക്കിയില്‍ ഉണ്ടായ ഏറ്റവും വലിയ ഭൂചലനമാണിത്.