മുംബൈ: യുഎസ് ഫോറന്‍സിക് ഫിനാന്‍ഷ്യല്‍ റിസര്‍ച്ച്‌ സ്ഥാപനം ഹിന്‍ഡന്‍ബര്‍ഗ് ഉയര്‍ത്തിയ ആരോപണങ്ങള്‍ പിടിച്ചുലച്ചതിന് പിന്നാലെ ഇന്ത്യയിലെ മുന്‍നിര പത്രങ്ങള്‍ക്ക് ഒന്നാം പേജ് പരസ്യം നല്‍കി അദാനി ഗ്രൂപ്പ്. ഗ്രൂപ്പുമായി ബന്ധപ്പെട്ട നെഗറ്റീവ് വാര്‍ത്തകള്‍ മാധ്യമങ്ങളില്‍ നിറയുന്ന സാഹചര്യത്തില്‍ കൂടിയാണ് പരസ്യം. ജനുവരി 28ന് പുറത്തിറങ്ങിയ ടൈംസ് ഓഫ് ഇന്ത്യ, ദ ഇന്ത്യന്‍ എക്‌സ്പ്രസ്, നവ്ഭാരത് ടൈംസ്, ദ ഹിന്ദു പത്രങ്ങളുടെ വിവിധ എഡിഷനുകളില്‍ ജാക്കറ്റ് പരസ്യമാണ് അദാനി നല്‍കിയിട്ടുള്ളത്.
അദാനി ഗ്രൂപ്പ് എന്താണ് എന്ന് വിശദീകരിക്കുന്നതാണ് പരസ്യം. രാഷ്ട്രനിര്‍മാണത്തിലാണ് അദാനിയുടെ ശ്രദ്ധയെന്നും ആത്മനിര്‍ഭര്‍ ഭാരതില്‍ നിന്ന് ‘ഭാരത് പര്‍ നിര്‍ഭര്‍ ലോക’ത്തേക്കുള്ള ഇന്ത്യയുടെ യാത്രയ്ക്ക് അദാനി ഇന്ധനമേകുന്നു എന്ന് പരസ്യം പറയുന്നു. വിപണിമൂല്യത്തില്‍ ഇന്ത്യയിലെ ഏറ്റവും വലിയ ലിസ്റ്റഡ് കമ്ബനിയാണ് അദാനി, ഇന്ത്യയില്‍ സുസ്ഥിര അടിസ്ഥാന സൗകര്യവികസനത്തില്‍ കമ്ബനിയുടെ ട്രാക്ക് റെക്കോഡ് മികച്ചതാണ്- പരസ്യം പറയുന്നു.