സന്തോഷ് ട്രോഫി ഫുട്ബാളിലെ നിര്‍ണായക മത്സരത്തില്‍ മുന്‍ ചാമ്ബ്യന്മാരായ മഹാരാഷ്ട്രയോട് സമനില വഴങ്ങി കേരളം.അവസാന നിമിഷം വരെ ആവേശം നിറഞ്ഞ മത്സരത്തില്‍ ഇരു ടീമുകളും നാലു ഗോളുകളടിച്ച്‌ സമനിലയില്‍ പിരിയുകയായിരുന്നു. ആദ്യ പകുതിയില്‍ ഒന്നിനെതിരെ നാല് ഗോളുകള്‍ക്ക് മുന്നിലായിരുന്ന മഹാരാഷ്ട്രക്കെതിരെ രണ്ടാം പകുതിയില്‍ മൂന്ന് ഗോളുകള്‍ തിരിച്ചടിച്ചാണ് കേരളം കൈവിട്ടുപോയ കളി തിരിച്ചുപിടിച്ചത്. കേരളത്തിനായി വിശാഖ് മോഹനന്‍, നിജോ ഗില്‍ബര്‍ട്ട്, വി. അര്‍ജുന്‍, ജോണ്‍ പോള്‍ എന്നിവര്‍ ഗോളുകള്‍ നേടി.
മഹാരാഷ്ട്രക്കുവേണ്ടി സൂഫിയാന്‍ ഷെയ്ഖ് (രണ്ട് ഗോള്‍), ഹിമാന്‍ഷു പാട്ടീല്‍, സുമിത് ഭണ്ഡാരി എന്നിവര്‍ വലകുലുക്കി. സമനിലയോടെ കേരളത്തിന്‍റെ സെമി സാധ്യത തുലാസിലായി. ആദ്യ മത്സരത്തില്‍ ഗോവയെ തോല്‍പിച്ച കേരളം രണ്ടാം മത്സരത്തില്‍ കര്‍ണാടകയോട് തോല്‍വി ഏറ്റുവാങ്ങിയിരുന്നു. ആറു ടീമുകളുള്ള ഗ്രൂപില്‍ നാലു പോയന്‍റുമായി നാലാമതാണ് കേരളം. ഏഴു പോയന്‍റുള്ള കര്‍ണാടകയും പഞ്ചാബുമാണ് ഒന്നും രണ്ടും സ്ഥാനങ്ങളില്‍.പഞ്ചാബും ഒഡിഷയുമാണ് അടുത്ത എതിരാളികള്‍. സെമിയില്‍ കയറാന്‍ ഈ രണ്ട് മത്സരങ്ങളില്‍ കേരളത്തിന് വിജയിച്ചാല്‍ മാത്രം പോര, മറ്റ് മത്സര ഫലങ്ങളെ കൂടി ആശ്രയിക്കണം.