അമ്മയുടെ ഫോണില്‍ കളിക്കുന്നതിനിടെ അഞ്ചുവയസുകാരി ആമസോണില്‍ നിന്ന് ഓര്‍ഡര്‍ ചെയ്തത് 2.47 ലക്ഷം രൂപയുടെ കളിപ്പാട്ടങ്ങള്‍. യുഎസിലെ മസാച്യുസെറ്റിലെ ലില വരിസസ്‌കോയാണ് അമ്മക്ക് മുട്ടന്‍ പണി കൊടുത്തത്.
പുറത്തുപോയി വരുമ്പോള്‍ ഡ്രൈവിങ്ങിനിടെ കുട്ടിക്ക് അമ്മ ഫോണ്‍ കൊടുത്തിരുന്നു. ഈ സമയത്താണ് മകള്‍ അമ്മയുടെ ആമസോണ്‍ അക്കൗണ്ടില്‍ നിന്ന് കളിപ്പാട്ടങ്ങളും ഷൂവുകളുമായി ലക്ഷങ്ങളുടെ ഓര്‍ഡര്‍ ചെയ്തത്. പത്ത് കളിപ്പാട്ടങ്ങളും 10 ജോഡി കൗഗേള്‍ ബൂട്ടുകളുമാണ് ഓര്‍ഡര്‍ ചെയ്തത്.
ജീപ്പുകളും ബൈക്കുകളും ഉള്‍പ്പെടെയുള്ള കളിപ്പാട്ടങ്ങളുടെ വില 2.21 ലക്ഷം രൂപയും ബൂട്ട് ഒന്നിന് 49,000 രൂപയും വില വരുന്നതാണെന്ന് കുട്ടിയുടെ മാതാവ് പറഞ്ഞു. ഓര്‍ഡര്‍ ചെയ്ത വിവരം അറിയാന്‍ വൈകിയെന്നും അതിനാല്‍ ചില ഓര്‍ഡറുകള്‍ മാത്രമേ റദ്ദാക്കാനായുള്ളൂവെന്നും അവര്‍ പറഞ്ഞു.