ജിഷ എന്ന പെണ്‍കുട്ടിയെ ഒരു അന്യസംസ്ഥാന തൊഴിലാളി കൊന്ന ദാരുണ സംഭവത്തിന്റെ പേരില്‍ പെണ്‍കുട്ടികള്‍ക്കും അമ്മൂമ്മമാര്‍ക്കും വീട്ടില്‍ കിടന്നുറങ്ങാന്‍ കഴിയാതായിരിക്കുന്നു എന്ന് ചാനല്‍ മൈക്കുകളുടെ മുന്നില്‍ വന്നുനിന്ന് വിളിച്ചുപറഞ്ഞ നാണംകെട്ട രാഷ്ട്രീയ നേതാവാണ് പിണറായി വിജയനെന്ന് കെപിസിസി അധ്യക്ഷനും കോണ്‍ഗ്രസ് നേതാവുമായ കെ സുധാകരന്‍. പിണറായി വിജയന്റെ ഭരണകാലത്ത് മെഡിക്കല്‍ കോളേജ് ഐസിയുവില്‍ വരെ സ്ത്രീകള്‍ പീഡിപ്പിക്കപ്പെടുന്ന അവസ്ഥ വന്നിരിക്കുന്നു അദ്ദേഹം പറഞ്ഞു.
തലസ്ഥാന നഗരത്തില്‍ മരുന്ന് വാങ്ങാനായി രാത്രി പുറത്തിറങ്ങിയ വീട്ടമ്മ അക്രമിക്കപ്പെട്ടതും ഞെട്ടിക്കുന്ന സംഭവമാണ്. ആ സ്ത്രീ ആക്രമണം ഉടന്‍ തന്നെ പോലീസിനെ അറിയിച്ചിട്ടും നടപടി ഉണ്ടായില്ല. തിരുവനന്തപുരത്ത് തന്നെ പട്ടാപ്പകല്‍ ഒരു പെണ്‍കുട്ടി ആക്രമിക്കപ്പെടുന്നതും കഴിഞ്ഞ ദിവസം കേരളം കണ്ടു. സ്ത്രീകള്‍ക്കെതിരെയുള്ള അക്രമങ്ങള്‍ നിയമസഭയില്‍ ചര്‍ച്ച ചെയ്യരുതെന്നാണ് പിണറായി വിജയന്റെ സര്‍ക്കാര്‍ പറയുന്നത്. ഈ അനീതി ചോദ്യം ചെയ്ത പ്രതിപക്ഷത്തെ വനിതാ എംഎല്‍എ യുടെ കൈ തല്ലിയൊടിച്ച സ്ത്രീ വിരുദ്ധ ജന്മങ്ങളാണ് നിയമസഭയിലെ ഭരണപക്ഷം അദ്ദേഹം ഓര്‍മിപ്പിച്ചു.
കേരളം ചോദിച്ചു വാങ്ങിയ ദുരന്തമാണ് പിണറായി വിജയന്റെ ഭരണം. കൂട്ട ബലാത്സംഗങ്ങള്‍ തുടര്‍ക്കഥയായിരിക്കുന്നു കേരളത്തില്‍.കുത്തേറ്റും വെട്ടേറ്റും , എന്തിന് വെടിയുണ്ടകളേറ്റുപോലും ഈ ഭരണത്തില്‍ പെണ്‍കുട്ടികള്‍ കൊല്ലപ്പെട്ടിരിക്കുന്നു.വീട്ടില്‍ കിടന്നുറങ്ങാന്‍ മാത്രമല്ല പിണറായി , സര്‍ജറി കഴിഞ്ഞ് ആശുപത്രിക്കിടക്കയില്‍ വിശ്രമിക്കാന്‍ പോലും കേരളത്തിലെ പെണ്‍കുട്ടികള്‍ക്ക് നിങ്ങളുടെ ഭരണം കൊണ്ട് കഴിയാതായിരിക്കുന്നു അദ്ദേഹം കുറ്റപ്പെടുത്തി.
സകല വര്‍ഗ്ഗീയക്കളികളും കളിച്ച് നാണംകെട്ട വ്യാജപ്രചാരണങ്ങളും നടത്തി അധികാരത്തില്‍ കടിച്ചു തൂങ്ങുന്ന നിങ്ങള്‍ക്ക് കേരളത്തിലെ പെണ്‍കുട്ടികളുടെ ജീവനും സുരക്ഷയും ഒന്നും ഒരു പ്രശ്‌നമല്ല എന്ന് ഞങ്ങള്‍ക്കറിയാം.രാഷ്ട്രീയ ധാര്‍മികതയും മാന്യതയും അവശേഷിക്കുന്ന ഒരൊറ്റ നേതാവ് പോലും സിപിഎമ്മില്‍ അവശേഷിക്കുന്നില്ല എന്നതാണ് രാഷ്ട്രീയ കേരളത്തെ ദു:ഖിപ്പിക്കുന്നത്.കേരളത്തിലെ പെണ്‍കുട്ടികള്‍ സുരക്ഷിത ജീവിതത്തിന് വേണ്ടി കേഴുമ്പോള്‍ ആഢംബര ജീവിതത്തില്‍ സ്വയം മറന്ന് അഭിരമിക്കുകയാകാം ആഭ്യന്തരമന്ത്രി കൂടിയായ കേരളത്തിന്റെ മുഖ്യമന്ത്രി.
നിയമവ്യവസ്ഥകളെയും കേരള പോലീസിനെയും യാതൊരു ഭയവും ഇല്ലാതെ സ്ത്രീ പീഡകര്‍ അഴിഞ്ഞാടുമ്പോളും എങ്ങനെ കൊള്ള നടത്താം, എങ്ങനെ അഴിമതിപ്പണം സമ്പാദിക്കാം എന്നൊക്കെ ഗവേഷണം നടത്തിക്കൊണ്ടിരിക്കുന്ന പിണറായി വിജയനെ ആഭ്യന്തരമന്ത്രിക്കസേരയില്‍ നിന്നെങ്കിലും ചെവിക്ക് പിടിച്ച് തൂക്കി വെളിയില്‍ ഇടാന്‍ സിപിഎമ്മില്‍ നട്ടെല്ലുള്ള ഒരു നേതാവ് ഉണ്ടായിരുന്നെങ്കിലെന്ന് രാഷ്ട്രീയ കേരളം ആഗ്രഹിച്ചു പോകുകയാണ് അദ്ദേഹം തുറന്നടിച്ചു.