നിയമസഭ സംഘര്‍ഷത്തിന്റെ പേരില്‍ പ്രതിപക്ഷത്തിന് നേരെ ഉന്നയിച്ച വ്യാപക നുണകള്‍ക്കെതിരെ പ്രതികരണവുമായി മുസ്‌ലിം ലീഗ് എംഎല്‍എ കെപിഎ മജീദ്. നുണകള്‍ കൊണ്ടൊരു ചീട്ടുകൊട്ടാരമുണ്ടാക്കി അതിലൊരു സിംഹാസനവുമിട്ടാണ് പിണറായി വിജയന്‍ കേരളം ഭരിക്കുന്നതെന്ന് അദ്ദേഹം പറഞ്ഞു.
അദ്ദേഹം പങ്കുവെച്ച പ്രസ്താവയുടെ പൂര്‍ണരൂപം
പൊട്ടാത്ത എല്ലുകള്‍ പൊട്ടിക്കാനും പൊട്ടിയ എല്ലുകള്‍ പൊട്ടിയിട്ടില്ലെന്ന് ചിത്രീകരിക്കാനും സി.പി.എം കഴിഞ്ഞ ദിവസങ്ങളില്‍ നടത്തിയ നാടകങ്ങളെല്ലാം പൊട്ടിയിരിക്കുകയാണ്. വാച്ച് ആന്റ് വാര്‍ഡ് അംഗത്തിന്റെ കൈ പൊട്ടിയെന്ന് പറഞ്ഞാണ് പ്രതിപക്ഷ എം.എല്‍.എമാര്‍ക്കെതിരെ ജാമ്യമില്ലാ വകുപ്പ് പ്രകാരം കേസെടുത്തത്. അങ്ങനെയൊരു സംഭവമില്ലെന്ന മെഡിക്കല്‍ റിപ്പോര്‍ട്ട് ഇപ്പോള്‍ പുറത്തുവന്നിരിക്കുന്നു.
കൈക്ക് പരിക്കേറ്റ കെ.കെ രമയുടേത് നാടകമാണെന്ന് സി.പി.എമ്മുകാര്‍ വ്യാപകമായി പ്രചരിപ്പിച്ചു. നുണകള്‍ കൊണ്ടും അധിക്ഷേപങ്ങള്‍ കൊണ്ടുമുള്ള ശരവര്‍ഷമായിരുന്നു. അതിനായി വ്യാജ എക്സറേയും പ്രചരിപ്പിച്ചു. പേരടക്കം വെട്ടി ഒട്ടിച്ചാണ് വ്യാജ എക്സറേ പ്രചരിപ്പിച്ചത്. പരിക്ക് മാറാത്തതിനാല്‍ അവര്‍ തുടര്‍ ചികിത്സയിലാണ്.
നുണകള്‍ കൊണ്ടൊരു ചീട്ടുകൊട്ടാരമുണ്ടാക്കി അതിലൊരു സിംഹാസനവുമിട്ടാണ് പിണറായി വിജയന്‍ കേരളം ഭരിക്കുന്നത്.