ചണ്ഡീഗഢ്: പഞ്ചാബില്‍ ഒരു കുടുംബത്തിലെ നാലുപേരെ വെടിവെച്ച് കൊന്നു. ഗുരുദാസ്പൂരിലാണ് സംഭവം. ഗൃഹനാഥനായ മംഗള്‍സിങ്, മക്കളായ സുഖ്ബീര്‍ സിങ്, ജസ് വീര്‍ സിങ്, മംഗള്‍സിങ്ങിന്റെ കൊച്ചുമകനായ ബല്‍ദീപ് സിങ് എന്നിവരാണ് കൊല്ലപ്പെട്ടത്. രണ്ടു പേര്‍ക്ക് ഗുരുതരമായ പരിക്കുണ്ട്. ഇന്ന് രാവിലെയായിരുന്നു സംഭവം.
സുഖ് വീന്ദര്‍സിങ് എന്നയാളാണ് വെടിവെപ്പ് നടത്തിയതെന്ന് കൊല്ലപ്പെട്ടവരുടെ ബന്ധുക്കള്‍ ആരോപിച്ചു. കൊല്ലപ്പെട്ടവരുടെ കുടുംബവും സുഖ്‌വീന്ദറും തമ്മില്‍ വസ്തുതര്‍ക്കം നിലനിന്നിരുന്നു. ഇതാണ് വെടിവെപ്പില്‍ കലാശിച്ചതെന്നാണ് വിവരം.
ഞായറാഴ്ച രാവിലെ വീട്ടിലേക്ക് ഇരച്ചെത്തിയ സുഖ്‌വീന്ദര്‍ സിങ് സോണി മംഗള്‍സിങ്ങിനും കുടുംബത്തിനും നേരേ തുരുതുരാ വടിയുതിര്‍ക്കുകയായിരുന്നു. രണ്ടുപേര്‍ സംഭവസ്ഥലത്തുവെച്ചുതന്നെ മരിച്ചു. രണ്ടുപേര്‍ ആശുപത്രിയിലാണ് മരിച്ചത്. ഗുരുതരമായി പരിക്കേറ്റ രണ്ടുപേര്‍ ചികിത്സയിലാണ്. സംഭവത്തില്‍ വിശദമായ അന്വേഷണം നടത്താന്‍ വിവിധ സംഘങ്ങളെ നിയോഗിച്ചു.