തൃശൂര്‍ റിട്ടയേര്‍ഡ് അധ്യാപികയെ തലയ്ക്ക് അടിച്ച് കൊലപ്പെടുത്തിയ കേസില്‍ അയല്‍വാസി പിടിയില്‍. അധ്യാപികയുടെ അതേ നാട്ടുകാരനായ മണി എന്ന ജയരാജനാണ് പൊലീസ് പിടിയിലായത്. മതില്‍ ചാടികടന്ന് ഇയാള്‍ വീട്ടിലെത്തിയെന്നും, പിന്നീട് സ്വര്‍ണാഭരണം തട്ടിയെടുക്കാനായി പിടിവലിക്കിടെ അധ്യാപിക തലയിടിച്ച് വീണുവെന്നാണ് പ്രതി പൊലീസിന് മൊഴി നല്‍കിയത്.
കവര്‍ച്ച ചെയ്യപ്പെട്ട സ്വര്‍ണാഭരണം പ്രതിയുടെ വീട്ടില്‍ നിന്നും കണ്ടെടുത്തിട്ടുണ്ട്. ഇന്ന് രാവിലെ 7 മണിയോടെയായിരുന്നു കൊലപാതകം. ഗണേശമംഗലം സ്വദേശിയായ വസന്ത (76) ആണ് കൊല്ലപ്പെട്ടത്. കഴിഞ്ഞ 20 വര്‍ഷമായി അധ്യാപിക വീട്ടില്‍ തനിച്ചാണ് താമസിച്ചിരുന്നത്. മൃതദേഹം വീടിന്റെ പുറകുവശത്ത് കമിഴ്ന്നുകിടക്കുന്ന നിലയിലാണ് കണ്ടെത്തിയത്. ടീച്ചറുടെ ശരീരത്തില്‍ ഉണ്ടായിരുന്ന വളയും ചെയിനും നഷ്ടപ്പെട്ടിരുന്നു. സംഭനസ്ഥലത്ത് ഫോറന്‍സിക് സംഘവും റൂറല്‍ എസ്പി ഐശ്വര്യ ഡോങ്‌റയുടെ നേതൃത്വത്തില്‍ ഉന്നട പൊലീസ് സംഘവുമെത്തിയിരുന്നു.