ചവറ: തലനാരിഴയ്ക്ക് ജീവന്‍ തിരിച്ചു കിട്ടിയ ഒരു കാല്‍നടക്കാരനു വേണ്ടിയുള്ള തിരച്ചിലിലാണ് എല്ലാവരും. ആരാണ് ആ ഭാഗ്യവാന്‍ ! വെള്ളിയാഴ്ച രാവിലെ മുതല്‍ സമൂഹ മാധ്യമങ്ങളിലും അല്ലാതെയും അന്വേഷിക്കുകയാണ് ചവറക്കാര്‍, ഒപ്പം ലോകവും. ച
സംഭവം ഇങ്ങനെ:
വെള്ളിയാഴ്ച രാവിലെ ആറുമണി കഴിഞ്ഞ് ദേശീയപാതയില്‍ വിജയപാലസിനു മുന്നിലൂടെ കൈയ്യിലൊരു സഞ്ചിയും മുഴക്കോല്‍ എന്നു തോന്നുന്ന ഒരു സ്‌ക്വയര്‍ ട്യൂബുമായി ശങ്കരമംഗലം ഭാഗത്തേക്ക് ഓരം ചേര്‍ന്ന് നടന്നു പോവുകയായിരുന്നു അയാള്‍. എതിര്‍ദിശയില്‍ നിന്നും ഒരു വാനും പിന്നാലെ ലോറിയും വരുന്നത് കാണാം. പെട്ടെന്ന് നടന്നുപോകുന്നയാളുടെ പിന്നില്‍ നിന്നും ഇയാളെ ഇടിച്ചു തെറിപ്പിച്ചെന്ന് തോന്നും വിധം ഇന്‍സുലേറ്റഡ് മിനി വാന്‍ നിയന്ത്രണം വിട്ട് റോഡും കടന്ന് അയാളുടെ ഇടതു വശത്തു കൂടി കടന്നുപോയി.
ഇതൊന്നുമറിയാതെ നടന്നു നീങ്ങിയ യാത്രക്കാരനു മുന്നിലെ ക്യാമറത്തൂണില്‍ വാന്‍ ഇടിക്കുന്നതു കണ്ടപ്പോഴാണ് സ്ഥലകാല ബോധം വന്നത്. അതോ പോയതോ! തിരിഞ്ഞോടിയ ശേഷം നില്‍ക്കുകയും അല്‍പ നേരം പ്രാര്‍ഥനാ നിരതനായശേഷം അയാള്‍ വന്നവഴിക്ക് തിരിച്ച് നടക്കുകയും ചെയ്യുന്നത് ദൃശ്യത്തില്‍ കാണാം. പൊലീസ് റോഡരികില്‍ സ്ഥാപിച്ചിട്ടുള്ള ക്യാമറ ഇടിച്ചു തെറിപ്പിച്ച് മറിയാതെ അദ്ഭുതകരമായി റോഡില്‍ കയറി മുന്നോട്ട് പോകുന്നത് വരെയാണ് വിഡിയോ ദൃശ്യം.
കുറച്ചു മുന്നോട്ട് പോയശേഷം നിര്‍ത്തിയ വാനില്‍ നിന്നു പൊലീസെത്തി രണ്ടു പേരെ പുറത്തിറക്കി സ്റ്റേഷനിലെത്തിച്ചു. സ്ഥിരമായി പാലുമായി പോകുന്നതായിരുന്നു ചങ്ങനാശേരിയിലുള്ള വാന്‍. ഡ്രൈവര്‍ ഉറങ്ങിയതാണ് അപകട കാരണം. ആളപായമില്ലാത്തതിനാലും ക്യാമറ പുനഃസ്ഥാപിച്ചു നല്‍കാമെന്ന് സമ്മതിച്ചതിനാലും കേസെടുക്കാതെ വിട്ടയച്ചതായി ചവറ പൊലീസ് പറഞ്ഞു.