റമദാനില്‍ ഉംറ നിര്‍വഹിക്കാന്‍ ആഗ്രഹിക്കുന്ന തീര്‍ഥാടകര്‍ക്കായി സൗദി ഹജ്, ഉംറ മന്ത്രാലയം പുതിയ മാര്‍ഗനിര്‍ദേശങ്ങള്‍ പുറത്തിറക്കി. തീര്‍ഥാടകര്‍ക്ക് ഇനി ഉംറ ആവര്‍ത്തിക്കാന്‍ അനുവാദമില്ലെന്നും വിശുദ്ധ മാസത്തില്‍ ഒരിക്കല്‍ മാത്രമേ ഉംറ ചെയ്യാന്‍ കഴിയൂ എന്നും മന്ത്രാലയം വ്യക്തമാക്കി. റമദാനില്‍ ഉംറ നിര്‍വഹിക്കാന്‍ ആഗ്രഹിക്കുന്ന എല്ലാ തീര്‍ഥാടകര്‍ക്കും എളുപ്പത്തിലും സൗകര്യത്തോടെയും ഉംറ നിര്‍വഹിക്കാനുള്ള അവസരം ഉറപ്പാക്കാനാണ് ഈ നീക്കം.
ഉംറ നിര്‍വഹിക്കുന്നതിന് നുസുക്ക് ആപ്പില്‍ നിന്ന് പെര്‍മിറ്റ് നേടേണ്ടതിന്റെയും നിര്‍ദ്ദിഷ്ട സമയം പാലിക്കേണ്ടതിന്റെയും പ്രാധാന്യം മന്ത്രാലയം ചൂണ്ടിക്കാട്ടി. തീര്‍ഥാടകര്‍ക്ക് പെര്‍മിറ്റ് സമയം നല്‍കുന്നതിന് മുമ്പ് ആപ്പ് വഴി അവരുടെ അപ്പോയിന്റ്‌മെന്റ് ഇല്ലാതാക്കാനും തീയതി മാറ്റണമെങ്കില്‍ പുതിയ പെര്‍മിറ്റ് നല്‍കാനും കഴിയും.
സൗദി പൗരന്മാര്‍ക്കും താമസക്കാര്‍ക്കും സജീവ വിസയുള്ള വിദേശികള്‍ക്കും ഉംറ പെര്‍മിറ്റുകള്‍ ലഭ്യമാണെന്ന് മന്ത്രാലയം അറിയിച്ചു. താല്‍പ്പര്യമുള്ള വ്യക്തികള്‍ നുസുക് ആപ്പ് വഴി അവരുടെ പെര്‍മിറ്റുകള്‍ നേരത്തെ നേടാനും അവരുടെ ഉംറ നിര്‍വഹിക്കുന്നതിന് നിര്‍ദ്ദിഷ്ട തീയതി പിന്തുടരാനും അഭ്യര്‍ത്ഥിക്കുന്നു. ആപ്പിള്‍ സ്‌റ്റോറില്‍ നിന്നോ ഗൂഗിള്‍ പ്ലേയില്‍ നിന്നോ നുസുക് ആപ്പ് ഡൗണ്‍ലോഡ് ചെയ്യാം.
കൂടാതെ, ഉംറ തീര്‍ഥാടകരുടെ സുരക്ഷ ഉറപ്പാക്കാന്‍ ആവശ്യമായ എല്ലാ മുന്‍കരുതലുകളും മന്ത്രാലയം സ്വീകരിച്ചിട്ടുള്ളതിനാല്‍, വിദേശത്ത് നിന്ന് വരുന്നവര്‍ അവര്‍ക്ക് കോവിഡ് 19 ഇല്ലെന്നും അല്ലെങ്കില്‍, രോഗബാധിതനായ വ്യക്തിയുമായി സമ്പര്‍ക്കം പുലര്‍ത്തിയിട്ടില്ലെന്നും ഉറപ്പാക്കണം.