ഷാര്‍ജ: തൊഴിലാളികള്‍ തമ്മിലുള്ള പ്രശ്‌നം പരിഹരിക്കാന്‍ എത്തിയ മലയാളി യുവാവ് കുത്തേറ്റുമരിച്ചു. ഷാര്‍ജയിലാണ് ദാരുണ സംഭവം അരങ്ങേറിയത്.
ഷാര്‍ജ ബുത്തീന്‍ നെസ്റ്റോ ഹൈപ്പര്‍മാര്‍ക്കറ്റില്‍ മാനേജറായി ജോലി ചെയ്യുന്ന
മണ്ണാര്‍ക്കാട് , കാഞ്ഞിരപ്പുഴ , കല്ലാംകുഴി സ്വദേശി അബ്ദുല്‍ ഹക്കീം (36) ആണ് പാകിസ്ഥാനി സ്വദേശിയുടെ ക്രൂരതക്ക് ഇരയായത്.
കഴിഞ്ഞ പത്ത് വര്‍ഷത്തോളമായി യു എ ഇ യില്‍ ജോലി ചെയ്യുന്ന ഹക്കീമിന്റെ പ്രവാസം ആരംഭിച്ചത് നെസ്റ്റോയില്‍ തന്നെയായിരുന്നു. ജീവിതം അവസാനിച്ചതും ഇവിടെത്തന്നെയായി മാറിയെന്നതില്‍ സഹപ്രവര്‍ത്തകരും സുഹൃത്തുക്കളും ഏറെ ദു:ഖിതരാണ്.
പടലത്ത് ഹംസയാണ് പിതാവ്. കോവിഡ് ബാധിച്ചു മരണപ്പെട്ട സക്കീന മാതാവാണ്. ഷഹനയാണ് ഭാര്യ. മക്കള്‍ : സിയ മെഹ്ഫില്‍ മൂന്ന് വയസ്സ്, ഹയ ഇശല്‍ ഒരു വയസ്സ്.
സഹോദരങ്ങള്‍ ജംഷാദലി , സമീന. ഏതാനും മാസംമുമ്പാണ് ഹക്കീമിന്റെ കുടുംബം നാട്ടിലേക്ക് പോയത്. നടപടിക്രമങ്ങള്‍ പൂര്‍ത്തിയാക്കി മയ്യിത്ത് നാട്ടിലേക്ക് കൊണ്ടുപോകും.