ഒന്നാം വര്‍ഷ വിദ്യാര്‍ഥിനിക്കു നേരെ കാമ്പസിനുള്ളില്‍ ലൈംഗികാതിക്രമം ഉണ്ടായതിനെത്തുടര്‍ന്ന് ഹൈദരാബാദിലെ ഇംഗ്ലിഷ് ആന്‍ഡ് ഫോറിന്‍ ലാംഗ്വേജസ് യൂണിവേഴ്‌സിറ്റിയില്‍ (ഇഫ്‌ലു) വിദ്യാര്‍ഥികളുടെ പ്രക്ഷോഭം.
സംഭവത്തില്‍ നടപടി സ്വീകരിക്കാന്‍ അധികൃതര്‍ വൈകിയെന്നും യൂണിവേഴ്‌സിറ്റിയിലെ ഹെല്‍ത്ത് സെന്റര്‍, അതിജീവിതയ്ക്ക് മതിയായ പരിചരണം നല്‍കിയില്ലെന്നും വിദ്യാര്‍ഥികള്‍ ആരോപിച്ചു. പ്രതിഷേധത്തേത്തുടര്‍ന്ന് സംഭവവുമായി ബന്ധപ്പെട്ട് രണ്ടുപേരെ പൊലീസ് അറസ്റ്റു ചെയ്തു.
വ്യാഴാഴ്ച രാത്രി 10 മണിയോടെയാണ് സംഭവം. പഴയ ഹെല്‍ത്ത് സെന്ററിനു സമീപം വിദ്യാര്‍ത്ഥിനിയെ അബോധാവസ്ഥയില്‍ കണ്ടെത്തുകയായിരുന്നു. ലൈംഗികാതിക്രമങ്ങള്‍ റിപ്പോര്‍ട്ടു ചെയ്യാന്‍ പ്രത്യേക സമിതി രൂപീകരിക്കണമെന്ന് ആവശ്യപ്പെട്ട് വിദ്യാര്‍ഥികള്‍ സമരം ചെയ്തതിന്റെ തൊട്ടടുത്ത ദിവസമാണ് പീഡനം നടന്നത്. പ്രധാന സെക്യൂരിറ്റി ചെക്ക്‌പോസ്റ്റില്‍നിന്ന് ഏതാനും മീറ്ററുകള്‍ മാത്രം അകലെയാണ് അതിക്രമം നടന്നതെന്നും വിദ്യാര്‍ഥികള്‍ പറയുന്നു.