കോഴിക്കോട്: റെയില്‍ സ്‌റ്റേഷന്‍ പ്ലാറ്റ്‌ഫോമുകള്‍ തെരുവുനായ്ക്കള്‍ താവളമാക്കിയതോടെ യാത്രക്കാര്‍ ഭീതിയില്‍. പ്ലാറ്റ്‌ഫോമിന്റെ അങ്ങിങ്ങായി പതിയിരിക്കുന്ന നായകള്‍ യാത്രക്കാര്‍ക്കു നേരെ കുരച്ചു ചാടുകയാണ്. തെരുവുനായ ഭീതി സൃഷ്ടിക്കുന്ന സാഹചര്യത്തില്‍ നായകളെ നിയന്ത്രിക്കണമെന്ന ആവശ്യവുമായി യാത്രക്കാര്‍ രംഗത്തെത്തി.
ട്രെയിന്‍ യാത്രക്കാരുടെ സംഘടനയായ സി.എ.ആര്‍.യു.എ മുഖ്യമന്ത്രി, മന്ത്രിസഭാംഗങ്ങള്‍, ചീഫ് സെക്രട്ടറി, ഡി.ജി.പി, തിരുവനന്തപുരം, പാലക്കാട് ഡിവിഷന്‍ റെയില്‍വേ മാനേജര്‍മാര്‍ എന്നിവര്‍ക്ക് പ്ലാറ്റ്‌ഫോമുകളില്‍ നിന്ന് പകര്‍ത്തിയ ഫോട്ടോ സഹിതം പരാതി നല്‍കി.