പൊലീസ് സ്റ്റേഷനില്‍ അതിക്രമിച്ച് കയറിയെന്ന് ആരോപിച്ച് റോജി എം ജോണ്‍ എംഎല്‍എക്കെതിരെ കേസെടുത്തു. കാലടി പൊലീസാണ് കേസെടുത്തത്. കാലടി ശ്രീ ശങ്കരാ കോളേജിലെ കെഎസ്യു ഭാരവാഹികളെ അന്യായമായി തടങ്കലില്‍ ഇട്ടു എന്ന് ആരോപിച്ച് സ്റ്റേഷനില്‍ എത്തിയ എംഎല്‍എ ഇവരെ ലോക്കപ്പില്‍ നിന്ന് പുറത്തിറക്കിയിരുന്നു. ഇതിനാണ് കേസടുത്തത്.
ശ്രീ ശങ്കരാ കോളേജില്‍ വെള്ളിയാഴ്ച വിദ്യാര്‍ത്ഥികള്‍ തമ്മില്‍ സംഘര്‍ഷം ഉണ്ടായിരുന്നു. പിന്നാലെ ചില വിദ്യാര്‍ത്ഥികള്‍ക്ക് നേരെ പൊലീസ് കേസെടുത്തു. പിന്നാലെ വീടുകളിലെത്തി പൊലീസ് അറസ്റ്റ് രേഖപ്പെടുത്തുകയും ഇവര്‍ക്ക് ജാമ്യം അനുവദിക്കുകയും ചെയ്തു. ഇതിനുശേഷം കേസില്‍ കെഎസ്യു യൂണിറ്റ് പ്രസിഡണ്ട് രാജീവിനെയും മറ്റു രണ്ടുപേരെയും ശനിയാഴ്ച രാത്രി പൊലീസ് അറസ്റ്റ് ചെയ്യുകയായിരുന്നു. ഇത് അന്യായമായി തടങ്കലിലാക്കി എന്ന് ആരോപിച്ചാണ് എംഎല്‍എ സെല്ല് തുറന്നു വിട്ടത്.