കളിക്കുന്നതിനിടെ അടുത്ത വീട്ടിലേക്കു തെറിച്ചുപോയ പന്തെടുക്കാന്‍ ചെന്ന കുട്ടിയെ വീട്ടുടമ പട്ടികക്കടിച്ച് കാലിന്റെ എല്ല് പൊട്ടിച്ചു. പൂണിത്തുറ വളപ്പിക്കടവ് കോളനിയില്‍ ബ്ലായിത്തറയില്‍ അനില്‍ കുമാറിന്റെ മകന്‍ നവീനിന്റെയാണ് (10) ഇടതുകാലിന്റെ എല്ല് രണ്ടിടത്തായി പൊട്ടിയത്. ചമ്പക്കര സെയ്ന്റ് ജോര്‍ജ് സ്‌കൂളിലെ അഞ്ചാംക്ലാസ് വിദ്യാര്‍ഥിയാണ്.
ഞായറാഴ്ച വൈകീട്ട് ആറുമണിയോടെയാണ് സംഭവം. നവീന്‍ കൂട്ടുകാരൊത്ത് വീടിന് സമീപത്തെ പറമ്പില്‍ ഫുട്‌ബോള്‍ കളിക്കുമ്പോഴാണ് പന്ത് അടുത്ത വീടിന് സമീപത്തേക്ക് തെറിച്ചുപോയത്. ഇതെടുക്കാന്‍ കയറിയ നവീനെ വീട്ടുടമ പട്ടിക കൊണ്ടു മുതുകിലും, കാലിലും അടിക്കുകയായിരുന്നു. അടിയേറ്റ കുട്ടി കരഞ്ഞുകൊണ്ട് ഓടി രക്ഷപ്പെട്ടു.
തുടര്‍ന്നു വീട്ടിലെത്തി മാതാപിതാക്കളോട് വിവരം പറഞ്ഞു. ഉടന്‍ തൃപ്പൂണിത്തുറ താലൂക്ക് ആശുപത്രിയില്‍ എത്തിച്ചു. എക്‌സ്‌റേയിലാണ് കാലിന്റെ എല്ലിന് രണ്ടു പൊട്ടല്‍ ഉള്ളതായി കണ്ടെത്തിയത്. സംഭവത്തില്‍ സമീപവാസിയായ ദിവ്യദീപം വീട്ടില്‍ ബാലന്റെ പേരില്‍ കേസെടുത്തതായി മരട് പോലീസ് അറിയിച്ചു.