കൊല്ലം: കോവിഡ് പോസിറ്റീവ് സ്ഥിരീകരിച്ച് മരിച്ച ചൂനാട് ഇലിപ്പക്കുളം മറ്റത്ത് വീട്ടില്‍ 72 കാരി മറിയക്കുട്ടി ജോര്‍ജ്ജിന്റെ മൃതദേഹം മറവു ചെയ്യാന്‍ ബന്ധുക്കളും നാട്ടുകാരും മടിച്ചു നിന്നപ്പോള്‍ മുന്നോട്ട് വന്നത് വെറ്റ്ഗാര്‍ഡ് അംഗങ്ങള്‍. മൃതദേഹം മറവു ചെയ്യുന്നതുമായി ബന്ധപ്പെട്ട പ്രശ്‌നം സി.എച്ച്. സെന്ററിലെ പി.കെ. മുനീര്‍ പാണക്കാട് സയ്യിദ് മുനവ്വറലി ശിഹാബ് തങ്ങളെ അറിയിക്കുകയായിരുന്നു.
തങ്ങളുടെ നിര്‍ദ്ദേശപ്രകാരം മുസ്ലിം ലീഗ് കൊല്ലം ജില്ലാ സെക്രട്ടറി ഷിഹാബ് ആലുക്ക, യൂത്ത് ലീഗ് വൈറ്റ് ഗാര്‍ഡ് കൊല്ലം ജില്ലാ ക്യാപ്റ്റന്‍ ഹിഷാം സംസം,കുന്നത്തൂര്‍ മണ്ഡലം വൈസ് പ്രസിഡന്റ് മൗലവി സിയാദ് കൗസരി, എന്നിവര്‍ ചേര്‍ന്ന് ചൂനാട് സെന്റ് തോമസ് മാര്‍ത്തോമാ പള്ളി സെമിത്തേരിയില്‍ അടക്കം ചെയ്യുകയായിരുന്നു.ആരോഗ്യ പ്രവര്‍ത്തകരുടെയും പൊലീസിന്റെയും സാന്നിധ്യത്തിലായിരുന്നു മൃതദേഹം സംസ്‌കരിച്ചത്.