ജയ്പൂര്‍: രാജസ്ഥാനില്‍ കൊലക്കേസ് പ്രതിയെ കോടതിയിലേക്ക് കൊണ്ടു പോകുന്നതിനിടെ പൊലീസ് വാഹനം തടഞ്ഞ് നിര്‍ത്തി എട്ടംഗ സംഘം വെടിവെച്ച് കൊന്നു. കൊല്ലപ്പെട്ടയാള്‍ക്കൊപ്പമുണ്ടായിരുന്ന കൂട്ടു പ്രതിക്ക് വെടിവെപ്പില്‍ പരിക്കേല്‍ക്കുകയും ചെയ്തു. ഭരത്പൂര്‍ കോടതിയിലേക്ക് പ്രതികളുമായി പോവുകയായിരുന്ന പൊലീസ് ബസ് അമോലി ടോള്‍ പ്ലാസക്കു സമീപം കാറിലും ബൈക്കിലുമായി എത്തിയ എട്ടംഗ സംഘം തടഞ്ഞു നിര്‍ത്തുകയായിരുന്നു.
തുടര്‍ന്ന് പൊലീസുകാര്‍ക്ക് നേരെ മുളക് പൊടി വിതറിയ സംഘം വാഹനത്തിലേക്ക് ഇരച്ച് കയറി വെടിയുതിര്‍ക്കുകയായിരുന്നു. കുല്‍ദീപ് ജഗീന എന്നയാളാണ് കൊല്ലപ്പെട്ടത്. അക്രമികളെ സി.സി.ടിവി ദൃശ്യങ്ങള്‍ വഴി തിരിച്ചറിഞ്ഞതായും ഇവര്‍ സഞ്ചരിച്ച വാഹനം പിടിച്ചെടുത്തതായും ഭരത്പൂര്‍ എസ്.പി അറിയിച്ചു. കഴിഞ്ഞ വര്‍ഷം സെപ്തംബറില്‍ ഭൂമി ഇടപാടുമായി ബന്ധപ്പെട്ട തര്‍ക്കത്തില്‍ കൃപാല്‍ ജഗീന എന്നയാളെ കൊലപ്പെടുത്തിയ കേസിലെ പ്രതിയാണ് കൊല്ലപ്പെട്ട കുല്‍ദീപ്.