2024 ലോക്‌സഭാ തെരഞ്ഞെടുപ്പിന് മുന്നോടിയായി ബിജെപി വിരുദ്ധ രാഷ്ട്രീയ പാര്‍ട്ടികളുമായി സഖ്യം ചേരാനൊരുങ്ങി നടന്‍ കമല്‍ഹാസന്റെ പാര്‍ട്ടിയായ മക്കള്‍ നീതി മയ്യം. കോയമ്പത്തൂര്‍, മധുര, സൗത്ത് ചെന്നൈ എന്നീ മൂന്ന് മണ്ഡലങ്ങളിലാണ് പാര്‍ട്ടി ശ്രദ്ധ കേന്ദ്രീകരിക്കുന്നത്. 2019ലെ ലോക്‌സഭാ തെരഞ്ഞെടുപ്പിലും 2021 നിയമസഭാ തെരഞ്ഞെടുപ്പിലും പാര്‍ട്ടി മികച്ച പ്രകടനം കാഴ്ച വെച്ച മണ്ഡലങ്ങളാതിതെല്ലാം.
പാര്‍ട്ടി സ്വീകരിക്കാന്‍ പോകുന്ന രാഷ്ട്രീയ നടപടികളെക്കുറിച്ച് കമല്‍ഹാസന്‍ പാര്‍ട്ടി ജില്ലാതല പ്രവര്‍ത്തകരെ ധരിപ്പിച്ചതായി പാര്‍ട്ടി വൃത്തങ്ങള്‍ ദേശീയ മാധ്യമങ്ങളോട്
പറഞ്ഞു. 2021 ലെ നിയമസഭാ തെരഞ്ഞെടുപ്പില്‍, തമിഴ്‌നാട്ടിലെ മൊത്തം വോട്ട് വിഹിതത്തിന്റെ 3.43 ശതമാനം എംഎന്‍എം നേടിയിരുന്നു. ഈ സാഹചര്യത്തില്‍ മറ്റ് പാര്‍ട്ടിയുമായി സഖ്യം ചേരുന്നത് കൂടുതല്‍ സീറ്റുകള്‍ നേടാന്‍ സഹായിക്കുമെന്ന ധാരണയിലാണ് പാര്‍ട്ടി നേതൃത്വം.