കൊച്ചി: പ്രളയക്കെടുതിയെ തുടര്‍ന്ന് മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവനയിനത്തില്‍ ലഭിച്ചവയില്‍ 284 വണ്ടിച്ചെക്കുകളെന്ന് വിവരാവകാശരേഖ. പ്രളയദുരിതാശ്വാസനിധിയിലേക്ക് ആകെ 27919 ചെക്കുകളാണ് ലഭിച്ചത്. ഇതുവഴി ആകെ 1126 കോടിയിലേറെ രൂപയാണ് ദുരിതാശ്വനിധിയിലേക്ക് ലഭിച്ചത്. ആകെ ലഭിച്ച ചെക്കുകളില്‍ 430 എണ്ണമാണ് വിവിധ കാരണങ്ങളാല്‍ മടങ്ങിയത്. മടങ്ങിയ ചെക്കുകളില്‍ 184 എണ്ണത്തില്‍ നിന്ന് പിന്നീട് തുക ലഭിച്ചു. ബാക്കിയുള്ള 284 ചെക്കുകളില്‍ നിന്നുള്ള പണം ലഭ്യമാക്കാന്‍ നടപടി ആരംഭിച്ചതായും വിവരാവകാശ രേഖയില്‍ വ്യക്തമാക്കിയിട്ടുണ്ട്. മടങ്ങിയ ചെക്കുകള്‍, ഉടമകള്‍ക്ക് തിരികെ നല്‍കി പണമീടാക്കാനാണ് സര്‍ക്കാര്‍ ലക്ഷ്യമിടുന്നത്. ഇക്കാരണത്താല്‍ ഇവയുടെ ഉടമകളുടെ പേരുവിവരങ്ങള്‍ വെളിപ്പെടുത്താനാകില്ലെന്നും അണ്ടര്‍ സെക്രട്ടറി നല്‍കിയ മറുപടിയില്‍ പറയുന്നു.