ഇന്‍ഡോര്‍: കഴിഞ്ഞദിവസം മധ്യപ്രദേശ് ഇന്‍ഡോറില്‍ നാലുമാസം മാത്രം പ്രായമുള്ള പിഞ്ചു കുഞ്ഞിനെ ബലാല്‍സംഗം ചെയ്തു കൊന്ന പ്രതിയെ പോലീസ് കസ്റ്റഡിയില്‍ ആക്രമിച്ച് ജനക്കൂട്ടം.മജിസ്‌ട്രേറ്റ് കോടതിയില്‍ പ്രതിയെ ഹാജരാക്കാന്‍ എത്തിച്ചപ്പോഴാണ് ജനരോഷം അണപൊട്ടിയത്. ആക്രമണത്തില്‍ പ്രതിക്ക് സാരമായി പരുക്കേറ്റു.
പ്രതിയായ നവീന്‍ ഗാഡ്‌ജെയെ കോടതിയില്‍ കൊണ്ടു വരുന്നതറിഞ്ഞ് ജനക്കൂട്ടം നേരത്തെ കോടതി വളപ്പില്‍ തടിച്ചു കൂടിയിരുന്നു. പ്രതിയെ പൊലീസ് ജീപ്പില്‍ നിന്നിറക്കിയതും ജനക്കൂട്ടം ആക്രമിക്കുകയായിരുന്നു. കോടതിയില്‍നിന്നും പുറത്തിറക്കിയപ്പോഴും ആക്രമണം ഉണ്ടായി. ചില സ്ത്രീകള്‍ ചെരുപ്പുമായാണ് പ്രതിയെ നേരിട്ടത്. ജനകൂട്ടത്തിന്റെ ആക്രമണത്തില്‍ പ്രതിക്ക് സാരമായി പരുക്കേറ്റതായി പൊലീസ് മാധ്യമങ്ങളോട് പറഞ്ഞു.
രാജ്വാദ ഫോര്‍ട്ടിന് പുറത്തെ തെരുവില്‍ മാതാപിതാക്കള്‍ക്കൊപ്പം കിടന്നുറങ്ങുകയായിരുന്നു കുഞ്ഞ്. ഇവര്‍ക്ക് സമീപത്തായി പ്രതി നവീനും കിടന്നുറങ്ങുന്നുണ്ടായിരുന്നു. ഇതിനിടയില്‍ ഇയാള്‍ കുഞ്ഞിനെ എടുത്തുകൊണ്ടു പോയി പീഡിപ്പിക്കുകയായിരുന്നു. പുലര്‍ച്ചെ 4.45 ഓടെ ഇയാള്‍ കുഞ്ഞിനെയും തോളിലെടുത്ത് നടന്നുനീങ്ങുന്നതിന്റെ സിസിടിവി ദൃശ്യങ്ങള്‍ പൊലീസിന് ലഭിച്ചിരുന്നു. ഇതിനുപിന്നാലെയാണ് കൊലക്കു പിന്നില്‍ ഇയാളാണെന്ന് തിരിച്ചറിഞ്ഞത്.