പശുവിനെ കശാപ്പ് ചെയ്‌തെന്ന് ആരോപിച്ച് യുവാവിനെ പൊലീസ് വെടിവെച്ചുകൊന്നു. രാംപൂര്‍ ജില്ലയിലാണ് സംഭവം. സാജിദ് (23) ആണ് കൊല്ലപ്പെട്ടത്. കൂടെയുണ്ടായിരുന്ന ബബ്ലു എന്നയാള്‍ക്ക് പരിക്കേറ്റു. പൊലീസിനെ കണ്ട് ഇവര്‍ വെടിയുതിര്‍ത്തപ്പോഴാണ് തിരിച്ചു വെടിവച്ചതെന്നാണ് പൊലീസ് പറയുന്നത്.
പശുവിനെ കശാപ്പ് ചെയ്തതുമായി ബന്ധപ്പെട്ട അന്വേഷണത്തിനിടെയാണ് ശനിയാഴ്ച രാത്രി പ്രതികള്‍ മൊറാദാബാദില്‍നിന്ന് വാഹനത്തില്‍ വരുന്നുണ്ടെന്ന് വിവരം ലഭിച്ചത്. പത്വായി പൊലീസ് ഉടന്‍ തന്നെ വാഹനപരിശോധന ആരംഭിച്ചു. ഇത് ശ്രദ്ധയില്‍പ്പെട്ട യുവാക്കള്‍ പെട്ടെന്ന് വാഹനം തിരിക്കാന്‍ ശ്രമിച്ചപ്പോള്‍ നിയന്ത്രണം നഷ്ടപ്പെടുകയായിരുന്നു.
കാറില്‍നിന്ന് പുറത്തിറങ്ങിയ ഇവര്‍ പൊലീസിന് നേരെ വെടിയുതിര്‍ത്തപ്പോഴാണ് തിരിച്ചുവെടിവച്ചത്. പരിക്കേറ്റവരെ ആശുപത്രിയിലെത്തിച്ചെങ്കിലും സാജിദ് മരിച്ചു. ബബ്ലു ചികിത്സയിലാണ്-രാംപൂര്‍ എസ്.പി രാജേഷ് ദ്വിവേദി പറഞ്ഞു.
സാജിദും ബബ്ല്യുവും മൊറാദാബാദ് സ്വദേശികളാണ്. ഇവര്‍ നിരവധി ക്രിമിനല്‍ കേസുകളില്‍ പ്രതിയാണെന്ന് എസ്.പി പറഞ്ഞു. കൊലപാതകശ്രമം, ആയുധനിയമം എന്നീ വകുപ്പുകള്‍ പ്രകാരം പൊലീസ് കേസെടുത്തു. കാര്‍, നാടന്‍ പിസ്റ്റളുകള്‍, വെടിയുണ്ടകള്‍, പശുവിനെ കൊല്ലാന്‍ ഉപയോഗിക്കുന്ന ഉപകരണങ്ങള്‍ എന്നിവ ഇവരില്‍നിന്ന് പിടിച്ചെടുത്തതായി എസ്.പി പറഞ്ഞു.