തിരുവനന്തപുരം: ചലച്ചിത്ര നടി ജയഭാരതി മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 ലക്ഷം രൂപ സംഭാവന നല്‍കി. പ്രളയക്കെടുതിയില്‍ ദുരിതം അനുഭവിക്കുന്ന കേരളത്തിന് കൈത്താങ്ങായാണ് പത്തുലക്ഷം രൂപ നല്‍കിയത്.
സിനിമാമേഖലയിലുള്ളവര്‍ ദുരിതാശ്വാസനിധിയിലേക്ക് കാര്യമായി സംഭാവനകളൊന്നും ചെയ്തിരുന്നില്ലെന്ന് നേരത്തെ വിമര്‍ശനമുണ്ടായിരുന്നു. അടുത്തിടെ യുവനടന്‍ നിവിന്‍പോളി മുഖ്യമന്ത്രിയെകണ്ട് 25 ലക്ഷം രൂപ നല്‍കിയിരുന്നു. പ്രളയക്കെടുതി നേരിടുന്നതിനായി ഗായകന്‍ യേശുദാസ് കഴിഞ്ഞ ദിവസം 10 ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തിരുന്നു. നടന്മാരായ മോഹന്‍ലാല്‍ 25 ലക്ഷവും, മമ്മൂട്ടിയും ദുല്‍ഖര്‍ സല്‍മാനും ചേര്‍ന്ന് 25 ലക്ഷവും ദുരിതാശ്വാസ നിധിയിലേക്ക് സംഭാവന ചെയ്തിട്ടുണ്ട്.
തമിഴ്, തെലുങ്ക്, ഹിന്ദി സിനിമാ താരങ്ങളും കേരളത്തിലെ പ്രളയക്കെടുതി നേരിടുന്നതിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തിരുന്നു. ബാഹുബലി താരം പ്രഭാസ് ഒരു കോടി രൂപയാണ് സംഭാവന നല്‍കിയത്.