കോട്ടയം എരുമേലിയില്‍ ഭൂമിക്കടിയില്‍ നിന്നുണ്ടായ അസാധാരണ ശബ്ദത്തെ തുടര്‍ന്ന് ജിയോളജി വിദഗ്ധര്‍ പരിശോധനയ്‌ക്കൊരുങ്ങുന്നു. തിങ്കളാഴ്ച പകലും രാത്രിയും ഇന്ന് പുലര്‍ച്ചെയുമാണ് ശബ്ദം കേട്ടതെന്ന് നാട്ടുകാര്‍ പറഞ്ഞു. കോട്ടയം ജില്ലയിലെ കാഞ്ഞിരപ്പള്ളി, എരുമേലി പഞ്ചായത്തുകളില്‍ ഉള്‍പ്പെട്ട പ്രദേശങ്ങളിലാണ് ഭൂമിക്കടിയില്‍ നിന്ന് മുഴക്കവും ശബ്ദവും കേട്ടത്.
ഭൂമി കുലുങ്ങുന്നതായുള്ള ശബ്ദമാണ് ആദ്യം കേട്ടതെന്ന് നാട്ടുകാര്‍ പറഞ്ഞു. ആദ്യം കിണര്‍ കുഴിക്കുന്നതോ മറ്റോ ആണെന്ന് കരുതി. എന്നാല്‍ രാത്രി ഒന്‍പതോടെ വലിയ മുഴക്കം കേള്‍ക്കാന്‍ തുടങ്ങി. തുടര്‍ന്ന് നാട്ടുകാര്‍ പഞ്ചായത്ത് അംഗങ്ങളെയും എംഎല്‍എയെയും വിവരം വിളിച്ചറിയിച്ചു. ഇവരാണ് ജില്ലാ ഭരണകൂടത്തെയും ജിയോളജി വകുപ്പിനെയും വിവരമറിയിച്ചത്. ഇന്ന് രാവിലെ പതിനൊന്ന് മണിയോടെ ജിയോളജി വിദഗ്ധര്‍ എരുമേലി ചേനപ്പാടിയിലെത്തുമെന്നാണ് വിവരം.