പാലക്കാട് അട്ടപ്പാടി മധുവധക്കേസില്‍ കുറ്റക്കാരനെന്ന് കണ്ടെത്തിയ പ്രതികള്‍ക്ക് മണ്ണാര്‍ക്കാട് എസി.സി എസ്.ടി കോടതി ഇന്ന് ശിക്ഷ വിധിക്കും. 14 പ്രതികള്‍ കുറ്റക്കാരെന്ന് കണ്ടെത്തിയ കോടതി 2 പേരെ വെറുതെ വിട്ടിരുന്നു. മനപൂര്‍വമല്ലാത്ത നരഹത്യകുറ്റമാണ് ഇവര്‍ക്കെതിരെ തെളിഞ്ഞത്.
10 വര്‍ഷം വരെ കഠിന തടവ് ലഭിക്കാവുന്ന വകുപ്പാണിത്. ഒന്നാം പ്രതി ഹുസൈന് എതിരെ എസ്.സി എസ്.ടി അട്രാസിറ്റി ആക്റ്റ് പ്രകാരം ഉള്ള വകുപ്പുകള്‍ നിലനില്‍ക്കില്ലെന്ന് കോടതി കണ്ടെത്തി. രണ്ടാം പ്രതി മരക്കാര്‍, മൂന്നാം പ്രതി ഷംസുദ്ദീന്‍, അഞ്ചാം പ്രതി ടി. രാധാകൃഷ്ണന്‍, ആറാം പ്രതി അബൂബക്കര്‍, ഏഴാം പ്രതി സിദ്ദീഖ്, എട്ടാം പ്രതി ഉബൈദ്, ഒന്‍പതാം പ്രതി നജീബ്, പത്താം പ്രതി ജൈജു മോന്‍, പന്ത്രണ്ടാം പ്രതി പി. സജീവ്, പതിമൂന്നാം പ്രതി സതീഷ്, പതിനാലാം പ്രതി ഹരീഷ്, പതിനഞ്ചാം പ്രതി ബിജു എന്നിവര്‍ക്ക് എതിരെ എസ്.സി എസ്.ടി അട്രാസിറ്റി ആക്റ്റ് പ്രകാരമുള്ള വകുപ്പും നിലനില്‍ക്കും.