മധ്യപ്രദേശിൽ ഇത്തവണ പിൻവാതിലിലൂടെ ജനാധിപത്യവിരുദ്ധമായി ബി.ജെ.പി.യെ അധികാരത്തിലേറാൻ പൊതുജനം അനുവദിക്കില്ലെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ.
കഴിഞ്ഞ 18 വർഷത്തെ ബി.ജെ.പി.യുടെ അനീതികൾക്കും അക്രമങ്ങൾക്കും അഴിമതിനിറഞ്ഞ ഭരണത്തിനും പൂർണമായ അറുതി വരുമെന്നും അദ്ദേഹം പറഞ്ഞു. ഐ.സി.സി. ഓഫീസിൽ മധ്യപ്രദേശിലെ സ്ഥാനാർഥിനിർണയ ചർച്ചകൾക്കുശേഷം പ്രസ്താവനയിലായിരുന്നു പ്രതികരണം.
മധ്യപ്രദേശിൽ യുവാക്കൾക്കും സ്ത്രീകൾക്കും ദളിതർക്കും പിന്നാക്കവിഭാഗങ്ങൾക്കും ഏതാനും ദിവസങ്ങൾക്കുള്ളിൽ നീതി ലഭിക്കും. ഇത്തവണ രാജ്യദ്രോഹികൾക്ക് തക്കമറുപടി ജനം നൽകും. കോൺഗ്രസ് പൂർണ ഭൂരിപക്ഷത്തിലേക്ക് നീങ്ങുകയാണെന്നും അദ്ദേഹം പറഞ്ഞു.രാഹുൽഗാന്ധി, കെ.സി. വേണുഗോപാൽ തുടങ്ങിയ നേതാക്കൾ സ്ഥാനാർഥിനിർണയ ചർച്ചയിൽ പങ്കെടുത്തു.