ഭോപ്പാല്‍: ഗോ മൂത്രം കുടിച്ചതുകൊണ്ടാണ് തന്റെ ബ്രെസ്റ്റ് കാന്‍സര്‍ മാറിയതെന്ന് മലേഗാവ് സ്‌ഫോടനക്കേസ് പ്രതിയായ പ്രജ്ഞാ സിങ് താക്കൂര്‍. പശുവിന്റെ ചാണകത്തിനും മൂത്രത്തിനും നിരവധി ഔഷധ ഗുണങ്ങളുണ്ടെന്നും പ്രജ്ഞാ സിങ് പറഞ്ഞു. ഭോപ്പാലിലെ ബി.ജെ.പി സ്ഥാനാര്‍ത്ഥിയാണ് പ്രജ്ഞാ സിങ്.
അതേസമയം പ്രജ്ഞാ സിങ്ങിനെ പരിഹസിക്കുന്നതിനൊപ്പം ഗൗരവമുള്ള ചോദ്യങ്ങളും സോഷ്യല്‍ മീഡിയയില്‍ ഉയര്‍ന്നു. കാന്‍സര്‍ ബാധിതയാണെന്ന ഇളവിലാണ് പ്രജ്ഞാ സിങ് ജാമ്യത്തിലിറങ്ങിയത്. എന്നാല്‍ ഗോ മൂത്രം കുടിച്ചതിലൂടെ തന്റെ രോഗം മാറിയെന്നാണ് പ്രജ്ഞാ സിങ് ഇപ്പോള്‍ പറയുന്നത്. പിന്നെ എന്തിനാണ് രോഗത്തിന്റെ പേരില്‍ അവര്‍ക്ക് ജാമ്യം നല്‍കിയത് എന്ന ചോദ്യമാണ് പ്രധാനമായും ഉയരുന്നത്.
മലേഗാവ് സ്‌ഫോടനക്കേസില്‍ പ്രതിയായ ഹിന്ദുത്വ തീവ്രവാദിയാണ് പ്രജ്ഞാ സിങ് താക്കൂര്‍. മുംബൈ ഭീകരാക്രമണത്തിനിടെ കൊല്ലപ്പെട്ട ഹേമന്ദ് കാര്‍ക്കരെയെ താന്‍ ശപിച്ചു കൊന്നതാണെന്ന പ്രജ്ഞാ സിങ്ങിന്റെ പരാമര്‍ശം വന്‍ വിവാദത്തിന് കാരണമായിരുന്നു.