ലണ്ടന്‍: ഫേസ്ബുക്ക് ഉപയോക്താക്കളുടെ വിവരങ്ങള്‍ ചോര്‍ത്തി അമേരിക്കന്‍ തെരഞ്ഞെടുപ്പില്‍ ഡൊണാള്‍ഡ് ട്രംപിന്റെ പ്രചാരണത്തിനുവേണ്ടി ഉപയോഗിച്ച കേസില്‍ പ്രതിക്കൂട്ടിലായ കേംബ്രിഡ്ജ് അനലിറ്റിക്കയുടെ ഓഫീസുകളില്‍ ബ്രിട്ടീഷ് അധികാരികള്‍ റെയ്ഡിന് തയാറെടുക്കുന്നു.
കമ്പനിയുടെ ലണ്ടനിലെ ഓഫീസുകളില്‍ റെയ്ഡ് നടത്താന്‍ കോടതിയുടെ വാറന്റിന് കാത്തിരിക്കുകയാണെന്ന് ഇന്‍ഫര്‍മേഷന്‍ കമ്മീഷണര്‍ അറിയിച്ചു. വാറന്റ് ആവശ്യപ്പെട്ട ഹര്‍ജിയില്‍ വാദം കേള്‍ക്കുന്നത് ലണ്ടന്‍ ഹൈക്കോടതി മാറ്റിവെച്ചിരുന്നു. കേംബ്രിഡ്ജ് അനലിറ്റിക്കുയുടെ പ്രവര്‍ത്തനം സംബന്ധിച്ച് അന്വേഷിക്കാന്‍ പ്രത്യേക സംഘത്തെ നിയോഗിച്ചിട്ടുണ്ട്. ഇന്ന് കോടതിയുടെ അനുമതി ലഭിക്കുന്നതോടെ റെയ്ഡ് നടക്കും. റെയ്ഡ് വൈകുന്നതിനെക്കുറിച്ച് കൂടുതല്‍ വിവരങ്ങള്‍ നല്‍കാന്‍ ഇന്‍ഫര്‍മേഷന്‍ കമ്മീഷണര്‍ തയാറായില്ല.