സ്‌കൂട്ടര്‍ യാത്രികയെ അടിച്ചുതള്ളിയിട്ട് കണ്ണില്‍ മുളകുപൊടി വിതറി സ്വര്‍ണമാല പൊട്ടിച്ചെടുത്ത മോഷ്ടാക്കളെ നാട്ടുകാര്‍ പിടികൂടി പൊലീസിലേല്‍പ്പിച്ചു. ചവറ മുകുന്ദപുരം കരിങ്ങാട്ടില്‍ വടക്കതില്‍ ഷാജി (48) കരുനാഗപ്പള്ളി ഇടപ്പള്ളിക്കോട്ട നെറ്റിയാട് തണ്ടളത്തുവീട്ടില്‍ സുഹൈല്‍(45) എന്നിവരാണ് പിടിയിലായത്. മൈനാഗപ്പളളി കടപ്പ സ്വദേശിയായ യുവതിയുടെ മാലയാണ് പ്രതികള്‍ പൊട്ടിച്ചത്.
ഇന്നലെ ഉച്ചയ്ക്ക് 12 മണിക്ക് ശാസ്താംകോട്ട റെയില്‍വെ സ്‌റ്റേഷന് മുന്നിലായിരുന്നു സംഭവം. ഇതുവഴി സ്‌കൂട്ടറില്‍ വരികയായിരുന്നു സ്‌കൂട്ടറില്‍ യുവതി. പിന്നാലെ എത്തിയ പ്രതികള്‍ സ്‌കൂട്ടറിന് പിന്നില്‍ തീപിടിച്ചെന്ന് പറഞ്ഞ് തെറ്റദ്ധരിപ്പിച്ചു. യുവതി റോഡരികലിക്ക് മാറ്റി നിര്‍ത്തി. സഹായ വാഗ്ദാനവുമായി മോഷ്ടാക്കളും വാഹനം നിര്‍ത്തി.
സ്‌കൂട്ടറില്‍ നിന്ന് ഇറങ്ങുന്നതിനിടെ യുവതിയെ അടിച്ചു വീഴ്ത്തി കൈയില്‍ സൂക്ഷിച്ചിരുന്ന മുളകുപൊടി കണ്ണില്‍ വിതറി. തിടുക്കത്തില്‍ മാലപൊട്ടിച്ചു കടക്കാന്‍ ശ്രമിക്കുന്നതിനിടെ കുറച്ചു ഭാഗം യുവതിയുടെ കൈയില്‍ കിട്ടി. ശേഷിച്ച മാലയുമായി മോഷ്ടാക്കള്‍ പോകാനുള്ള ശ്രമത്തിനിടെ യുവതി ഉറക്കെ നിലവിളിച്ചു. ഇതുകേട്ട സ്ഥലത്തുണ്ടായിരുന്ന യുവാക്കള്‍ മോഷ്ടാക്കളുടെ പിന്നാലെ ഓടി പിടിക്കുകയായിരുന്നു. ശാസ്താംകോട്ട പൊലീസെത്തി ഇരുവരേയും അറസ്റ്റ് ചെയ്തു സ്റ്റേഷനിലേക്ക് കൊണ്ടുപോയി.