തൃശ്ശൂരില്‍ ഭാര്യയുടെ കഴുത്ത് മുറിച്ച ശേഷം ഭര്‍ത്താവ് തൂങ്ങിമരിച്ചു. തൃശ്ശൂര്‍ കലൂരിലാണ് സംഭവം. 62 വയസ്സുള്ള ബാബുവാണ് മരിച്ചത്. ഗുരുതരമായി പരിക്കേറ്റ ഭാര്യ ഗ്രേസിനെ ആശുപത്രിയില്‍ പ്രവേശിപ്പിച്ചു.
ഇന്ന് പുലര്‍ച്ചെ രണ്ടു മണിയോടെയാണ് സംഭവം. ഉറങ്ങുകയായിരുന്ന ഭാര്യയുടെ കഴുത്ത് വെട്ടുകത്തി ഉപയോഗിച്ച് ഇയാള്‍ മുറിക്കുകയായിരുന്നു. പിന്നാലെ ഞെട്ടി എഴുന്നേറ്റ ഭാര്യ ഭര്‍ത്താവിനെ തള്ളി മാറ്റിയശേഷം അയല്‍ വീട്ടില്‍ അഭയം തേടി. രക്തത്തില്‍ കുളിച്ച നിലയിലായിരുന്നു അയല്‍ വീട്ടിലേക്ക് ഇവര്‍ ഓടിയത്. ഗുരുതരമായി പരിക്കേറ്റ ഇവരെ അയല്‍വാസികള്‍ തൃശ്ശൂരിലെ ഒരു സ്വകാര്യ ആശുപത്രിയില്‍ പ്രവേശിപ്പിച്ചു.
സംഭവത്തിന് പിന്നാലെ ബാബു വീട്ടുവളപ്പില്‍ തൂങ്ങി മരിക്കുകയായിരുന്നു. ഇരുവരും മാത്രമാണ് വീട്ടില്‍ ഉണ്ടായിരുന്നത്. മക്കള്‍ രണ്ടുപേരും വിദേശത്താണ്. കുടുംബ വഴക്കാണ് ആക്രമണത്തിന്റെ പിന്നിലെന്ന് കരുതുന്നതായി പോലീസ് പറയുന്നു. പുതുക്കാട് പൊലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു വരുന്നു.