ന്യൂഡല്‍ഹി: പെണ്‍കുട്ടിയെ ലൈംഗികമായി പീഡിപ്പിച്ച കേസില്‍ ആള്‍ദൈവം ദാതി മഹാരാജിനെ പൊലീസ് അറസ്റ്റ് ചെയ്തു. തെക്കുപടിഞ്ഞാറന്‍ ഡല്‍ഹിയിലെ ഫത്തേപൂര്‍ ബേരിയില്‍ നിന്നാണ് ഇയാളെ അറസ്റ്റ് ചെയ്തത്. രണ്ട് വര്‍ഷം മുമ്പ് ഡല്‍ഹിയിലേയും രാജസ്ഥാനിലേയും ആശ്രമങ്ങളില്‍ വെച്ച് ദാതി മഹാരാജ് തന്നെ പീഡിപ്പിച്ചതായി പെണ്‍കുട്ടിയുടെ പരാതിയില്‍ പറയുന്നു. പേടികൊണ്ടാണ് ഇതുവരെ പരാതിപ്പെടാതിരുന്നത്. ആശ്രമത്തിലെ നിരവധി പെണ്‍കുട്ടികള്‍ക്ക് നേരെ ഇയാള്‍ ലൈംഗികാതിക്രമം നടത്തിയിട്ടുണ്ടെന്നും യുവതി വെളിപ്പെടുത്തി.
നേരത്തേയും ഇയാള്‍ക്കെതിരെ പീഡനക്കേസുകള്‍ രജിസ്റ്റര്‍ ചെയ്തിട്ടുണ്ട്. ടെലിവിഷനില്‍ ആധ്യാത്മിക പരിപാടികള്‍ അവതരിപ്പിക്കുന്ന ദാതി മഹാരാജിന് ഡല്‍ഹിയിലും ഉത്തരേന്ത്യയിലും നിരവധി അനുയായികളുണ്ട്. ഐ.പി.സി 376, 377, 354, 34 വകുപ്പുകള്‍ ചുമത്തിയാണ് ഇയാള്‍ക്കെതിരെ കേസെടുത്തിരിക്കുന്നത്.