ലണ്ടന്‍: ഇംഗ്ലണ്ടിനെതിരേ കാര്‍ഡിഫില്‍ നടന്ന രണ്ടാമത്തെ ട്വന്റി20 മല്‍സരത്തില്‍ കളിച്ചതോടെ മുന്‍ ഇന്ത്യന്‍ നായകന്‍ എംഎസ് ധോണിക്ക് കരിയറില്‍ ഒരു റെക്കോര്‍ഡുകൂടി സ്വന്തമായി. അന്താരാഷ്ട്ര ക്രിക്കറ്റില്‍ 500 മല്‍സരങ്ങളെന്ന അപൂര്‍വ്വനേട്ടത്തിനാണ് ധോണി അര്‍ഹനായത്. അന്താരാഷ്ട്ര ക്രിക്കറ്റില്‍ ഈ നേട്ടം കൈവരിക്കുന്ന ഒമ്പതാമത്തെ താരമാണ് ധോണി. നേരത്തെ ഇന്ത്യന്‍ ടീമിന്റെ ദേശീയ ജേഴ്‌സിയില്‍ 500 ക്ലബ് പിന്നിട്ട താരങ്ങള്‍ ഇതിഹാസ താരങ്ങളായ സച്ചിന്‍ തെണ്ടുല്‍ക്കറും രാഹുല്‍ ദ്രാവിഡും മാത്രമാണ്. 318 ഏകദിനങ്ങളും 90 ടെസ്റ്റുകളും 92 ടി-20യും കളിച്ചാണ് ധോണി 500 എന്ന മാന്ത്രികസംഖ്യ പിന്നിട്ടത്. തന്റെ 37ാം പിറന്നാള്‍ ദിനത്തിലാണ് ധോണി ഈ നേട്ടം കൈവരിച്ചത് എന്നതാണ് മറ്റൊരു പ്രത്യേകത.
2004ല്‍ ബംഗ്ലാദേശിനെതിരെ ഏകദിന മത്സരത്തില്‍ വിക്കറ്റ് കീപ്പര്‍ ബാറ്റ്‌സ്മാനായി അരങ്ങേറിയ ധോണി ഏകദിനത്തില്‍ 10 സെഞ്ച്വറികളും 67 അര്‍ധസെഞ്ച്വറികളുമുള്‍പ്പെടെ 9967 റണ്‍സാണ് അടിച്ചെടുത്തത്. ടെസ്റ്റ് ക്രിക്കറ്റില്‍ 33 അര്‍ധസെഞ്ച്വറികളും ആറു സെഞ്ച്വറികളടക്കം 4876 റണ്‍സുമാണ് സമ്പാദ്യം. ടി-20യില്‍ രണ്ടു ഫിഫ്റ്റികളടക്കം 1455 റണ്‍സും ധോണി നേടിയിട്ടുണ്ട്. പ്രഥമ ടി-20യില്‍ ഇന്ത്യയെ ലോകകപ്പ് ജേതാക്കളാക്കിയതോടെയാണ് ധോണിയിലെ നായകനെ ലോകം അറിയുന്നത്. പിന്നീട് ഏകജദിന ലോകകപ്പും മിനി ലോകകപ്പ് എന്നറിയപ്പെടുന്ന ചാമ്പ്യന്‍സ് ട്രോഫിയും ഇന്ത്യയ്ക്ക് നേടിക്കൊടുത്ത ധോണി ഐസിസിയുടെ മൂന്നു ട്രോഫികളും സ്വന്തമാക്കിയ ഏക ക്യാപ്റ്റനെന്ന റെക്കോര്‍ഡും സ്വന്തം പേരിലാക്കി.ധോണിക്ക് കീഴില്‍ ടെസ്റ്റ് റാങ്കിങിലും ഇന്ത്യ ഒന്നാം സ്ഥാനത്ത് എത്തിയിരുന്നു. 2014 ഡിസംബറില്‍ ടെസ്റ്റ് ക്രിക്കറ്റില്‍ നിന്നും വിടവാങ്ങിയ ധോണി ഏകദിനത്തിലും ടി-20യിലം തുടരുകയാണ്.
അന്താരാഷ്ട്ര ക്രിക്കറ്റില്‍ ദേശീയ ടീമിനായി ഏറ്റവും കൂടുതല്‍ മത്സരം കളിച്ചെന്ന ഖ്യാതി ശ്രീലങ്കയുടെ മുന്‍ ക്യാപ്റ്റനും വിഖ്യാത ബാറ്റ്‌സ്മാനുമായ മഹേല ജയവര്‍ധനെയാണ്. 652 മല്‍സരങ്ങളാണ് ജയവര്‍ധനെ ലങ്കയ്ക്കായി കളിച്ചത്. സച്ചിനാണ് പട്ടികയില്‍ രണ്ടാംസ്ഥാനത്ത്(664 ), ലങ്കയുടെ കുമാര്‍ സങ്കക്കാര (594), സനത് ജയസൂര്യ (586), ഓസീസ് ഇതിഹാസം റിക്കി പോണ്ടിങ് (560), പാകിസ്താന്‍ സൂപ്പര്‍ താരം ഷാഹിദ് അഫ്രീഡി (524), ദക്ഷിണാഫ്രിക്കന്‍ സ്റ്റാര്‍ ജാക്വിസ് കാലിസ് (519), രാഹുല്‍ ദ്രാവിഡ് (509)എന്നിവരാണ് 500 ക്ലബ്ബില്‍ ഇടംനേടിയ മറ്റു താരങ്ങള്‍