കൊച്ചി: തിരുവനന്തപുരം കോര്‍പ്പറേഷന്‍ കത്ത് വിവാദത്തില്‍ സി.ബി.ഐ അന്വേഷണം വേണ്ടെന്ന് ഹൈകോടതിയുടെ ഉത്തരവ്. കോര്‍പ്പറേഷനിലെ താത്കാലിക നിയമനവുമായി ബന്ധപ്പെട്ട് തിരുവനന്തപുരം മേയര്‍ ആര്യ രാജന്‍ സിപിഎം ജില്ലാ സെക്രട്ടറിക്ക് അയച്ച കത്ത് രാഷ്ട്രീയ കേരളത്തില്‍ വലിയ കോലിളക്കമാണ് ഉണ്ടാക്കിയത്. നിഗൂഢമായ കത്തിന്റെ പേരില്‍ കൂടുതല്‍ അന്വേഷണത്തിന്റെ ആവശ്യമില്ലെന്നാണ് കോടതി വ്യക്തമാക്കിയത്.
മുന്‍ നഗരസഭ കൗണ്‍സിലറായ ജി എസ് ശ്രീകുമാറാണ് സിബിഐ അന്വേഷണം ആവശ്യപ്പെട്ട് കോടതിയെ സമീപിച്ചത്. ഒഴിവുകള്‍ നികത്താന്‍ പാര്‍ട്ടി സെക്രട്ടറി ആനാവൂര്‍ നാഗപ്പന് കത്തയച്ചത് സ്വജനപക്ഷപാതമാണെന്നായിരുന്നു ആരോപണം. കഴിഞ്ഞ രണ്ട് വര്‍ഷത്തിനിടെ ആയിരത്തിലധികം അനധികൃത നിയമനങ്ങള്‍ കോര്‍പ്പറേഷനില്‍ നടന്നതെന്നും ഹര്‍ജിയില്‍ പറയുന്നു.
സംഭവം വിവാദമായതോടെ ആര്യയുടെ രാജി ആവശ്യപ്പെട്ട് പ്രതിപക്ഷ പാര്‍ട്ടികള്‍ പ്രതിഷേധം നടത്തിയിരുന്നു. എന്നാല്‍ മേയര്‍ രാജി വയ്‌ക്കേണ്ടതില്ലെന്ന നിലപാടാണ് പാര്‍ട്ടി സ്വീകരിച്ചത്. സംഭവത്തില്‍ ക്രൈം ബ്രാഞ്ച് കേസെടുത്ത് പ്രാഥമിക അന്വേഷണം നടത്തി. അന്വഷണം തുടങ്ങിയെങ്കിലും അന്വേഷണ സംഘത്തിന് കത്തിന്റെ യഥാര്‍ഥ കോപ്പി കണ്ടെടുക്കാനായില്ല.